X
GO
da-DKkl-GL
Qanoq ilaasortanngussaanga?

 

 

SIK-mut ilaasortanngorneq pisariitsuuvoq:
• SIK-mut ilaasortanngorsinnaavutit suliffinni sinniisut attaveqarfigalugu ilaasortanngornissamullu immersugassaq immersorlugu. Illit nammineq SIP-mut (SIK-p immikkoortortaqarfianut) saaffiginnissinnaavutit ilaasortanngornissamullu immersugassaq immersorlugu.

• Aammali Illit nammineq ilaasortanngornissamut immersugassaq SIK-p nittartagaanit anillatsillugu immersorsinnaavat tunniullugulu imaluunniit sulisut sinniisaannutt tunniullugu SIP-mut imaluunniit SIK-mut ingerlateqqeqqullugu.

• Illit www.sik.gl -imit imaluunniit najukkanni SIP-mit aamma illit sinniisunnit ilaasortaanermut qanoq akiliuteqassanerlutit paasiniarsinnaavat. Ilaasortaanermut akiliut najukkami SIP-mit aalajangersarneqartarpoq.

• PBS aqqutigalugu ilaasortaaninnut akiliuteqartassaatit.

• Ilaasortaanermut akiliut akileraarnermut ukiumoortumik nalunaarusiornermi ilanngaatigineqarsinnaasarpoq.

SIK sunaava?
• SIK sulisartut peqatigiiffiisa kattuffigaat
• SIK-p nunatsinni sulinermik inuussutissarsiuteqartut 10.000-it pallillugit sullitarai
• SIK immikkoortortaqarfeqarpoq 25-nik (SIP)
• SIK ilaasortat sinnerlugit isumaqatiginninniartarpoq
• SIK tassaavoq Kalaallit Nunaanni sulinermik inuussutissarsiuteqartut oqaaseqartartuat sakkortooq

SIP sunaava?
• SIP najukkami sulinermik inuussutissarsiuteqartut peqatigiiffigaat kattuffimmut SIK-mut atasoq
• SIP-mi suliamik ilinniagaqarsimasuunngitsut aamma ilinniagaqarsimasut ilaasortaapput
• SIP-p sulisut sinniisaasa suliaat ataqatigiissaartarpai – sulisut sinniisaat SIP-p suliffinnut attaveqaatigai
• SIP-p najukkami suliffinnut sulisitsisunullu attaveqarneq isumagisaraa

SIK-p allattoqarfia sunaava?
• SIK-p allattoqarfia qitiusumik allaffiuvoq sullitaralugit siulersuisuunerit, immikkoortortaqarfiit, sulisut sinniisaat aamma ilaasortat.
• SIK-p allattoqarfianiipput aammattaaq ulluinnarni aqutsisut - taakku kattuffiup avataanut attaveqarnerit tamaasa isumagisaraat.

 

SIK-mut ilaasortaanerup iluaqutissartai

 

SIK-mut ilaasortaaguit

  • Suleqatit allat tuusintillit tapersersortigissavatit
  • Ilinniarsimasunik misilittagalinnillu ikiortissaqarlutillu siunnersortissaqarputit
  • Atugarisavit assinginik atugaqartut inuit naapissavatit
  • Siunissamut piareersassaatit nunarpullu piareersarlugu
  • Suliannut tunngasutigut sunniuteqarnerussaatit

SIK-p isumaqatigiissutit atorfeqarninnut tunngaviusut isumaqatigiinniutigisarpai, illillu ilaasortatut iluaqutissat tamaasa pissarsiarissavatit sunneeqataanissamullu periarfissaqalerlutit - toqqaannartumik imaluunniit sulisut sinniisaat SIK-llu immikkoortortaqarfia aqqutigalugit.

 

Isumaqatigiissutit pillugit siunnersorneqarneq

Akissarsiat, feeria, suliffinni atugarisat avatangiisillu, pisinnaatitaaffitit allarpassuillu pillugit paasisimasalinnit siunnersorneqassaatit. Illit illoqarfinni imaluunniit nunaqarfinni aamma nuna tamakkerlugu suliffeqarneq SIK-mi ilisimaarilluarpavut.

 

Isumannaannerunissaq

SIK-mi atorfeqarnermi atugarisat pillugit, akissarsiatigut, napparsimanermi, soraarsitaanermi aamma suliffissaaleqinermi isumaqatiginninniarnikkut isumannaannerusumik inissisimassaatit. Siunnersorneqarnermik, tapersersorneqarnermik aamma attaveqaqatigiinnermik neqeroorfigaatsigit.

 

Isumaqatigiissutit pillugit pikkorissarneq

Nunatsinni akissarsiat suliffeqarnermilu atugarisat pitsaanerulersinnissaannut peqataanissannut SIK-mi periarfissaqarputit. SIK isumaqatigiissutit pillugit pikkorissarnernik neqerooruteqarpoq. Tassani ataatsimoornermik nukittuumik misigisaqarsinnaavutit, kisianni aammattaaq illit suliffinni naapittakkannik unamminiarnartunik pitsanngortitsisinnaasunik piginnaaneqalissaatit atortussannillu pissarsillutit.

 

Kiffartuunneqarneq

SIK-mut ilaasortaanikkut sullinneqassaatit siunnersorneqarlutillu SIK-p aningaasaateqarfiinut qinnuteqaateqarnissamut, soorlu Sulinngiffeqarluni Angalanermut Aningaasaateqarfimmut, tassani feeriarluni angalanissamut akiliunneqarnissamut periarfissaqarmat. Illit qanigisat perululluni napparsimalerpat Isumaginninnikkut Aningaasaateqarfimmit ikiorneqarnissamik qinnuteqarsinnaavutit. Makku qinnuteqaatigineqarsinnaapput: Sulinngikkallarnermi isertitatigut annaasaqaatit matussuserneqarnissaat, ineqarneq, angalanissamut aningaasartuutissat aamma qanigisap ilerrata  angerlaanneqarnissaa.