X
GO
da-DKkl-GL
SIK
Ilaqutariit 549-t 2021-mi feeriarlutik angalanissaminnut makitaapput

22. septembari 2020: Nunatsinni imaluunniit Danmarkimut angalassutissat katillugit 12,2 mio. kr. makitsinikkut agguaanneqarput piffissap qinnuteqarfiusup aggustip aallaqqaataani qaangiunnerata kingorna.

SIK-p Sulinngiffeqarluni Angalanermut Aningaasaateqarfianut qinnuteqarsimasut 2.341-t sapaatip-akunnerani uani sms-ikkut ilisimatinneqarput 2021-mi nunatsinni imaluunniit Danmarkimut angalanissanut makitaasimasut – imaluunniit makitaasimanngitsut.

Taamalu qinnuteqarsimasut 549-t aappaagu feeriarnissaminnut qilanaalereersinnaanngorput. Taakkua agguagassarilerpaat 12,2 mio. kr. aningaasaateqarfiup siulersuisuisa ukiumut angalaffiusussamut akuersissutigisaat. Tassami inoqutigiit pineqartut assigiin­ngitsunik amerlassusillit nunatsinni ornitassanut assigiinngitsunut Danmarkimullu angalatinnissaat taama akeqartussaavoq.

2021-mi angalanissanut qinnuteqartut katillutik 3.285-iusimapput. Taakkua ilaat 2.341-t makitsinermi peqataanissamut akuerineqarput. Qinnuteqaatit atorsinnaanngitsut 535-usimapput, kiisalu aamma qinnuteqartut 409-t makitsinermi peqataatinneqarsinnaasimanngillat ukiut kingulliit sisamat ingerlaneranni ataasiarlutik makitaareersimagamik.

Makitsineq pivoq ulloq 24. aggusti 2020, sulisut sinniisaasa ilaat Nuummi SIK-p immikkoortortaqarfianut atasut uku makitsisuullutik: Rasmus Nielsen Dahl, Simon Christiansen aamma Benigne Larsen. Makitsinermi najuuppoq eqqartuussisoq Kristina Olsvig.

 

Una tooruk SIK-p Sulinngiffeqarluni Angalanermut Aningaasaateqarfia pillugu paasissutissanik atuarumallutit

 
2021-mut makitsinermit: Sulisut sinniisaat Rasmus Nielsen Dahl, sulisut sinniisaat Simon Christiansen, eqqartuussisoq Kristina Olsvig, Feriefondip allattaa Inge Lennert aamma sulisut sinniisaat Benigne Larsen.