X
GO
da-DKkl-GL
SIK
Peqqinnissaqarfimmik atuisut akiliuteqartarnissaat atulinngikkili

25. septembari 2019: SIK mianersoqqusisariaqarpoq. Atuisartut akiliuteqartarnissaat aningaasartuutinik aqutseriaatsitut atorneqalissappat imaaliallaannaq annertusineqaqattaalersinnaavoq – pilliutigineqartussallu taakkuussapput inuiaqatigiinni aningaasatigut pissakinnerusut taakkualu meeraat (siulittaasup oqaaseqaataa).

Peqqinnissami akeqanngitsumik isumagineqarsinnaanerup attatiinnarneqarnissaa. Tassa SIK-p sulisartut kattuffiattut Kalaallit Nunaanni inuppassuarnut attuumassuteqartutut politikkikkut sulissutigisassa­tut anguniagaasa ilaat. Aaqqissuussinerlu tamanna peqqinnissami naligiissitsisoqarnissaanik qulakkeerinnittuummat atorunnaarsissallugu pissutissa­qanngilagut. Sulissutigisassarli tas­saavoq aaqqissuussinerup ineriartortinneqarnissaa pit­sanngorsarneqartuarnissaalu.

Peqqinnissaq pillugu ataatsimiititaliarsuarmik pilersitsisoqarnissaa Demokraatit kissaatigigaat tu­sar­­parput. Ataatsimiititaliarsuullu isummerfigisassaasa ilagissavaanngooq atuisut ilaatigut akiliu­te­qartalersinnaanersut – soorlu nakorsaatinut kigutileritinnermullu tunngatillugu.

Tamanna tusaannarlugu immaqa pinartoqanngikkaluarpoq, atuisartut akiliuteqartarnerata annertuumik ingerlanneqarnissaa partiip eqqarsaatiginnginnerarmagu, siunertarinerarluguli peqqinnissaqarfimmut aningaasaliissutit ”eqqortumik atorneqarnissaat”.

Tassani SIK mianersoqqusisariaqarpoq. Atuisartut akiliuteqartarnissaat aningaasartuutinik aqutseriaatsitut atorneqalissappat imaaliallaannaq annertusineqaqattaalersinnaavoq – pilliutigineqartussallu taakkuussapput inuiaqatigiinni aningaasatigut pissakinnerusut taakkualu meeraat. Ilanngul­lu­gu taasariaqassaaq taamatut pisoqassappat kalaallit naalagaaffeqatigiinnerup ilaanut ani­ngaa­­sarissaarfiunerusu­mut nuukkusutsattut atamanna amerlisut.

Peqqinnissaqarfik pillugu ataatsimiititaliarsuarmik pilersitsisoqarnissaa tikilluaqqunarpoq peqqinnissap tungaatigut innuttaasut sullinneqarnerata qanoq pisariaqartutigut pitsan­ngor­­sarneqarsinnaa­nera misissorluarneqarniassammat.

Kisianni peqqinnissami akeqanngitsumik sullinneqarsinnaaneq innarlerneqassanngilaq. Atuisut akiliuteqartalernissaat pissakitsunut peqqiilliuutaaginnalissaaq – taamaalippallu siunissaq ungasinnerusoq eqqarsaatigalugu peqqinnissaqarfik akisunerulissajunnarsivoq-aasiit.

 

Jess G. Berthelsen
SIK-p siulittaasua