X
GO
da-DKkl-GL
SIK
Imminut soraarsinneq silatusaarnerunngilaq

20. marsi 2020: Coronap ernumatitsinerani inuiaqatigiinni isumagisassaqalerpugut imaannaan­ngit­sunik. Tamatumani tamatta ikioqatigiittariaqarpugut inooqataasutut pisussaanermik misigaluta nammaqatigiillutalu, sapinngisamik amerlanerpaat ajoratik ullut aggersut anigorniassammatigit.

Taamaattumik-una ajuusaarnartoq tusarlugu suliffimmi inuussutissanik nioqquteqar­tumi sulisut ilaasa suliffitsik qimakkaat taamalu ”imminnut soraarsillutik”, tunillatsinnissartik ernumagigamikku.

Ernumaneq immini paasinarpoq inuit ernumasarmata. Imminulli soraarsinneq  pissutsini maanna atuttuni silatusaarnerunaniluunniit nammaqatiginninnerunngilaq.

Inuussutissanik pilersuiffiit corona pissutigalugu sulisunik angerlartitsinernut suliffinnillu matusinernut ilaatinneqanngillat. Inuussutissanik pilersuineq piffissami nalorni­nartorsiorfiusumi atukkat-sinni tamakkiisumik ingerlanniarneqartussaavoq. Aammalu sulisitsisumit peqquneqarnani suliffik qimakkaanni suliffissaaruttutut pisortanit ikiorserneqarnissaq ajornakusoortorujussuussaaq.

Eqqarsaatigisariaqarparputtaaq pisiniarfiit ulluinnarni pisariaqartitatsinnik nioqqute­qarfiusut nutaa­nik sakkortusisanillu maanna piumasaqarfigineqarmata. Soorlu sulisut tamarmik Nunatsinni Nakorsaaneqarfiup eqqiluisaarnissamik ileqqorissaarnissamillu inassutigisai malittussaavaat. Aamma pisiniat taamaaliortussaapput. Tamattalu naatsorsuutigaarput tamarmik – tassa sulisitsisut sulisartullu pisiniallu – inassutinik malinnissasut, tamatta toqqissisimaniassagatta.

Tamakku eqqarsaatigalugit SIK-p ilaasortani sulisartullu allat kajumissaarusuppai inoo­qa­taasutut pisussaanermik misigeqqullugit uippallernaveersaaqqullugillu. Imminut soraarsinneq suliffimmillu qimaaneq ajornartorsiummik aaqqiissutaasinnaanngillat – ajor­nartorsiutinik nutaanik pilersitsiinnarlunilu toqqissisimajunnaarsitsiinnassaaq namminer­mut allanullu.

Naggataatigullu sulisartut uani pisumi pinngitsooratik sulisariaqartut nasaarfigalugillu SIK-miit qamannga pisumik qutsavigingaarlugit nersorpavut, minnerunngitsumik peq­qin­nissaqarfimmi sulisut. Aammali pisiniarfinni sulisut qamannga pisumik qutsavigine­qartariaqarput. Imaallaat tamatta paasivarput ulluinnarni inuuniarnitsinni pisiniarfinni sulisut qanoq pingaaruteqartigisumik inissisimasut! Tamassi tapersersorneqartariaqarpusi. Tapersersuinerlu tamanna pissaaq oqartussaasut coronavirusimik siaruatsaaliuinissaq pillugu inassutaannik kikkut tamarmik maleruaanerisigut – aamma niuerniat pisiniarfinni qanoq pissusilersornissaannik inassutit eqqarsaatigalugit.

Sulisartoqatikka! Tamatta uani immikkut pisumi nammaqatigiilluta suleqatigiissinnaanerput takutitsigu, ataqqeqatigiilluta.

Inussiarnersumik

Jess G. Berthelsen
kattuffiup siulittaasua