X
GO
da-DKkl-GL
SIK
Sulisut akissarsiaannut taarsiissuteqarsinnaaneq qanoq isumaqartoq

24. marsi 2020: Corona pissutigalugu iliuutsinik SIK-p siulittaasuata immikkoortortaqarfinnut sulisullu sinniisaannut ilisimatitsissutaa kajumissaarutitalik.

Soorlu kattuffitsinni suleqataasut tusagassiuutitigut tusarsimassagaat, Naalakkersuisut sapaatip-akunnerata siuliata naalernerani saqqummiussaqarput suliffiutillit suli­sartullu coronamik nappaalanerup nalorninartorsiortitsinerani aningaasatigut ikiorserneqarnissaannik. Qaammatini tulliuttuni pingasuniugallartoq taamatut ikiorsii­so­qarniarpoq.

Iliuuseriniakkat sapaatip-akunnerisa kingulliit ingerlaneranni ilusilerneqarsimapput suliffeqarnermi susassaqartut sinniisaat oqaloqatigisarlugit isumasiugaralugillu – tassa suliffiutillit kattuffii GE aamma Nusuka, aalisartut piniartullu kattuffiat KNAPK kiisalu sulinermik inuussutissarsiuteqartut kattuffiat SIK.

Suliffeqarfiit namminersortut sulisuisa akissarsiaannut taarsiissuteqarsinnaanermut tunngatillugu SIK-p soqutigisaa pingaarneq tassaavoq suliffeqarfiit coronamik nappaalanerup malitsigisaanik ajornartoortut sulisuminnik soraarsitsinnginnissaat. Taamaalilluni suliffeqarfiit sulisuminnik soraarsitsinatik angerlartitsigallaannarniarpata sulisut ani­ngaasarsiassaannut tapiissutissat 107 mio. kr.-it nunatta karsianit aningaasaliissu­ti­gineqarput.

Inuiaqatigiiusugut taama nalorninartorsiortiginitsinni taamatut aaqqiissuteqarnissaq SIK-p siulersuisuunerisa taperserpaat, aaqqiissutissaq imaattoq:

Suliffeqarfiit sulisumik minnerpaamik 30 pct.-iinik soraarsitsissamaartut imaluunniit sulisunik 25-iniit amerlanerusunik aaqqissuussineq taanna atorlugu akissarsianut annaasassanut taartisiaqartinneqarsinnaapput imatut aaqqissuussinerup iluani:

  • Akissarsiassanut annaasanut taartisiassat sulisorisap akissarsiaasa 75 pct.-iinut matussutaassapput, taamaattoq annertunerpaamik sulisumut ataatsimut qaammammut 20.190 kr.-it, soraarsitsinissaagaluamut taarsiullugu angerlartitsinermi.  
  • Suliffeqarfiup akissarsiassanut annaasanut taartisiassat annerpaamik qaammatinut pingasunut pissarsiarisinnaavai ulloq 30. juuni 2020 ilanngullugu. Akissar­si­assanut annaasassanut taartisiassat atorunnaassapput sulisitsisup sulisuni suli­lerseqqippagu.
  • Sulisoq akissarsiamigut taarsiissuteqarfigineqartoq aallaqqaammut feeriassaaq / afspadserissaaq ulluni tallimani. Qaammatit taarsissuteqarfigineqartut aallartinneri tamaasa ulluni tallimani feeriartoqaqqaarallartassaaq / afspadserer­to­qaqqaarallartassaaq. Sulisoq feeriassaqanngippat, afspadserigassaqan­ngippat il.il. ullunut tallimanut naapertuuttunik, akissarsiaqartinnagu sulinngikkallartinneqassaaq.

Tassa suliffeqarfiit namminersortut neqeroorfigineqarput piffissami naatsorsuutigine­qanngitsumik ajornartoorfiusumi aaqqiissuteqarfigineqarnissaannik, susassaqartut tamarmik pilliuteqarfigisaannik: Inuiaqatigiit ataatsimoorlutik karsiata akissarsianut ani­ngaasartuutissat amerlanerpaartaat matussusissavai. Suliffeqarfik aamma nammineq akiliissaaq. Sulisartut feeriassamik ilaannik atuinermikkut akileeqataassapputtaaq.

SIK-p immikkoortortaqarfii sulisullu sinniisaat kajumissaarusuppakka corona pissutiga­lugu sumiiffinni qanoq pisoqarnera alaatsinaaqqullugu. Kattuffimmut saaffiginnittarniarisi qanoq iliuusissanik nalornisooruteqaraangassi. Ilaasortallu kajumissaarusunnarput coronamik nappaalasoqarnera pissutigalugu soraarsitaassagaluarunik ilisimatitseq­qul­lu­git.

Kajumissaarutigeqqikkusuppara pissutsini atukkatsinni immikkorluinnaq ittuni takutissagipput sulisartoqatigiiulluta ataqqeqatigiinnikkut suleqatigiissinnaasugut.

 

Inussiarnersumik

Jess G. Berthelsen
kattuffiup siulittaasua