X
GO
da-DKkl-GL
SIK
Aalajangersagaq qanoq-una paasisarialik?

12. aggusti 2020: Coronap nalaani katersorsinnaanermut aalajangersakkat ersernerlullutillu paatsuunganartoqarnerat SIK-p siulittaasuata uparuarpaa.

SIK-p Nakkutilliisoqarfiata septembarimi ataatsimiinnissaa taamaatiinnarparput, ilisimatinneqaratta coronap siaruatsaaliorneqarnissaa pillugu nalunaarummi nutaami aalaja­nger­­sakkat naapertorlugit ataatsimiinnissat taamaattut ingerlanneqarsinnaanngitsut – tas­sa ataatsimiinnissat imaluunniit pikkorissarnissat ”kommuninit allanit angalaqqaarluni peqataaffigineqarsinnaasut” inerteqqutaammata.

Aamma paasigatsigu Utoqqaat Kattuffiata ataatsimiisitsiniarnera ilaatigut politikkimut tunngatillugu oqalliffiusussaq aammattaaq taamaatinneqartoq tamanna naammaagiinnarparput, immikkoortitsisoqarsinnaanngimmammi.

Soraarnerussutisiassanik aningaasaateqarfiup SISA-p ataatsimeersuarnissaa aamma taa­maatipparput, ilaatigut aammattaaq politikkertalik.

Maannakkulli paasivarput partiip Siumup ataatsimeersuarnissaa kateriffiulluni ingerlanniarneqartoq.

Tamatumani tunngavigineqarpoq nalunaarummi aalajangersagaq imaattoq: Killilersuutit uagut ataatsimiinnissanik pilersaarutitsinnik taamaatitsiinnarnitsinnut pissutaasut atuu­tinngitsut “katersuunnernut naalakkersuinikkut isummersornissamik siunertalinnut.”

Taava apererusunnarpoq: Suna politikikkimut attuumassuteqannginnami? Inuiaqatigiinni kattuffiit suut naalakkersuinikkut isummersorfiusannginnamik? Tassami peqatigiiffiit kattuffiillu inuiaqatigiilerinermi soqutigisanik aallussiffiusut isummersorneri tamarmik naa­lakkersuinermut (politikkimut) tunngassuteqarput.

Taamaattumiik Siumukkormiut naapillutik ataatsimeersuarnissaat ingerlanneqassappat SIK taarsiivigineqarnissaminut piumasaqassaaq, piffissamut ataatsimiinnissamut aaqqissuussinermut atukkatsinnut, bilitsinut annaasaqarsimanitsinnut il.il.

Una pivara: Tamatta assigiimmik pineqartariaqarpugut, aammalu inatsisiliortut sallersaallutik inatsisiliatik maligassiuillutik atuutsissavaat. Taamaanngippat maani nunami ikatto­qa­lissaaq.

 

Jess G. Berthelsen
SIK-p siulittaasua