X
GO
da-DKkl-GL
SIK
Ilaqutariit feeriarluarnertik qujamasuutigigaat

19. aggusti 2020: Ukioq manna Feriefondimit angalanerit arlalitsigut puigunaatsunik misigisaqarfioreerput. 2021-milu angalanissanut qinnuteqaatit katersorneqalereerput makitsinissamut piareersarlugit.

”Asasavut SIK-miut. Qujanakulooq Qaanaamiinnitsinnut nuannersumut puiugassarinngisatsinnik misigisaqartikkatsigut.” Allagaq qujaniut aggustimi ullut ilaanni kattuffimmut tunniunneqartoq taama aallartippoq. Allattuupput ilaqutariinnguit Qaqortumut angerlarlutik aqqusaartut – Avanersuarmut feeriarsimallutik.

Ilaqutariit taakku Tittussenikkut, tassa PaornánguaK’ uialu Niels-David ernerallu Simon-Peter, Europaliarnissaminnut makitaasimagaluarput SIK-p Sulinngiffeqarluni Angalanermut Aningaasaateqarfia (Feriefondi) 2019-imi aggustimi makitsisitsimmat 2020-mi angalanissanik. Aammalumi tamatumunnga qilanaaqaat.

Taavali corona nalornisoortitsilerpoq, taamalu nunatsinnit nunatsinnullu angallannerit killilersugaalerput. Tamatuma kingunerisaanik apriili naalersoq Feriefondi sms-ikkut nalunaa­ru­teqarpoq Danmarkiliarnissaminnut makitaasimasut bilitsissatik allanngortissinnaagaat nunatsinni namminermi angalasussanngorlutik. Amerlanerpaallu tamatumunnga akuersipput.

Ilaqutariit Tittussenikkut Qaanaamukarumallerput. Pakatsinngeqaallumi. Tassani sulinngiffeqarnerminni misigarpassuarminnik unnersiorput.

Assiliaaraq qujassut ilaqutariit SIK-p Nuummi allattoqarfianut tunniussaat aamma sulisartut kattuffiannut SIK-mut qujaniummik kissaassilluarnermillu imaqarpoq: ”Qanortoq SIK atajuarli, angusaqarluartarisi sulilluaqqikkisilu, nuan nuan nuan!” Naggaterpiaatigullu: ”Kiap allap taama pissammatugut?”

2021-mi feeriarnissanik qinnuteqartitsineq aggustip aallaqqaataani naavoq. Qinnuteqaatit immersukkat kisinneqaleruttorput inissitsiterlugillu. Makitsineq pissaaq ataasinngornermi aggustip 24-ani. Taavalu pissanganarluinnassaaq ukioq sulinngiffeqarluni angalaffiusussaq tulliuttoq qanoq ikkumaarnersoq.

 

Paornánguaq, Simon-Peter aamma Niels-David misigisanik ulikkaarlutik Qaanaami feeriareerlutik angerlamut Qaqortumut aqqutaani.