X
GO
da-DKkl-GL
SIK
SIK-mi siulittaasutut ukiut 30-t

16. septembari 2020: Marlunngorpat ukiut 30-nngussapput Jess G. Berthelsenip sulinermik inuussutissarsiuteqartut kattuffianni SIK-mi siulittaasunngorneranit.

Marlunngorneq 22. septembari 2020 Jess G. Berthelsenimut (62-inik ukiulimmut) ullorsiorfiussaaq. Tassami SIK-mi siulittaasunngorneranit ukiut 30-nngussapput. Taamanerniilli ataannartumik siulittaasuuvoq.

Siulittaasumut tulliulereersimalluni ulloq taanna Jess G. Berthelsen kattuffiup siulersuisuunerinit siulittaasunngortinneqarpoq. Taamaalillutik ukiut pingasut akulikitsuaqqamik siulittaasussarsiorfiusarsimasut uiverfioqqa­jaa­simasullu naapput – tassa siulittaasuugaluartoq Kristian ”Pablo” Poulsen siulersuisuunerit tunuartimmassuk ilaatigut aningaasaqarnikkut iliuuserisimasai isornartorsiungaatsiareerlugit.

Taamalu ukiut amerlasuut kattuffimmi aalajaatsumik ingerlatsiviusut aallartipput. Jess siulittaasutut qinigaaqqittuaannarpoq. SIK-lu taaneqaraangat kiisa Jess ingerlaannaq eqqaaneqartalerpoq.

Ukiunili 30-ni aalajaatsumik ingerlasimaneq ima paasineqassanngilaq SIK uninngasimasoq. Tassami Jess najuutsillugu unittoortoqarnavianngilaq – nammineq peqataanngikkaluaruniluunniit iliuuseqar­to­qarnissaa isumagisarpaa. Siunertarlu ajunngitsoq takorluukkamisut iluseqartillugu anguneqarsinnaarpianngitsoq paasigaangamiuk taava allatut ittumik angunialertarpaa. Pingaarnerpaavormi suli­sar­tunut ajunngitsussamik angusaqarnissaq.

Jessip aquttuunerani SIK kattuffittut ineriartorluarpoq inuiaqatigiinnilu suliassaminik aallussilluarluni. Suliat politikkikkut sunniuteqarniarnikkut aammalu isumaqatigiissutinik tamalaanik ineriartortitsinikkut ingerlanneqarput.

Taamatut suliniuteqarnikkut angusat tigussaasut ilagaat isumaginninnermut ani­ngaasaateqarfinnik taagorneqartunik pilersitsisimanerit.

 
Jess G. Berthelsenip SIK-mi siulittaasutut Atuagagdliutit/Grønlandspostenimi assinga siulleq.

Aningaasaateqarfiit taakku perulullutik nappar­simalersimasut qanigisaminnit ingiaqatigineqarnissaannut periarfissiisarput, inuppassuillu tamanna nuannaa­rutissarsiffigereerpaat. ”Isumaginninnikkut peqqinnissakkullu sillimmasiisarfiit silarsuarmi pitsaanersaat,” soorlumi Jessip nammineq taama oqaatigigai.

Jess inuuvoq ulapputissaqarujoortuaannartoq. Ullorsiorfimminilu Københavniliassaaq aningaasaqarnermut tunngasutigut ataatsimiinnissaq peqataaffigiartorlugu soraarnerussutisiassanik aningaasaateqarfiup SISA-p siulersuisuisa siulittaasuattut. SISA SIK-p 1994-imi pilersitaraa.
 

Ukiuni siullerni pisartunit assilisat marluk ilisarsinartut
 
Isumaqatigiinniarnermi pisoq ilisarnartoq: Jess kisitsilerpoq ...
 
 
Isumaqatigiinniarnerit unikkallarput - SIK-llu allaffiani piareersaatit nanginneqarput.