X
GO
da-DKkl-GL
SIK
Ôdâq Olsenip aningaasaateqarfianit kajumissaasiinerit

1. maaji 2020: SIK-mut ilaasortat maligassiuisut pingasut maajip aallaqqaataani kajumissaaserneqarput ”Immikkoortortaqarfitsialammillu” toqqaasoqarluni.

Nunarsuarmi tamarmi sulisartut ulluanni ileqquuvoq Ôdâq Olsenip Aningaasaateqarfia, SIK-p inger­lataa, sulisartut peqatigiiffianni ukiorpassu­ar­ni ilaasortaasimallutik sulisartoqarnermi ajunngitsumik sunniuteqartunik maligassaasunillu kaju­missaasiisarluni. Ullumi aamma taamaaliorpoq.

Tamatumuuna Qaqortumi, Ilulissani Upernavimmilu sulisartut peqatigiiffiinut ilaasortaasut uku taamatut nersorniarneqarput:

Anthon Joseassen, Qaqortoq: Ukiorpassuarni sulisartoqatini naligalugit ataqqillugillu sullissimavai. Ukiorpassuarni QSIP ”Sinniisoq”-mi siulersuisunut ilaasortaasimavoq, aammalu soraarnerussutisiassanik aningaasaateqarfimmi SISA-mi siulersuisunut ilaasortaasimalluni, piareersarluartartutut qiimasutullu ilisimaneqarluni.

Judithe Maqe, Ilulissat: 1970-imili SIK-mut ilaasortaavoq. Peqqinnissaqarfimmi sundhedshjælperitut sulivoq aalajaalluni, suliffini nuannaralugu tassanilu suliassat siamasissorujussuugaluartut unam­miniarnarsinnaagaluartullu naammassiniartarsimallugit maanna ukiuni 50-inngoreersuni – taamaalilluni sulisartunut maligassiuisuulluni.

Peter Petersen, Upernavik: Kajumissaaserneqarpoq ukiorpassuarni aalajaalluni sulisartuusimanini pissutigalugu, siullermik peqqinnissaqarfimmi 1975-imiit 1995-imut, kingornalu Royal Arctic Line-mi manna tikillugu, tassa katillugit ukiut 40-t.

Kajumissaasiinerit tamarmik 5.000 kr.-inik aningaasartaqarput.

2020-mi ”Immikkoortortaqarfitsialak”

Taamatuttaaq aamma kattuffiup immikkoortortaqarfiisa, sulisartut peqatigiiffiisa, ilaannik ukiu­moortumik nersorniaasoqartarpoq taallugu: ”Immikkoortortaqarfitsialak”. Ukioq mannalu Aasianni immikkortortaqarfik, ASIP, toqqagaavoq.

Taava sooq ASIP ”Immikkoortortaqarfitsialammik” taasariaqarpa? Tunngavilersuutaasut arlaliupput:

Ilaasortaqarluarpoq, ukiup qaangiuttup ingerlanerani amerlasuunik ilaasortassarsisimalluni. Ilaasortanik sullissilluarpoq, sammisassaqartitsilluartarlunilu. Suliffeqarfinnut attaveqarluarniarpoq. Kattuffimmik suleqateqarluarpoq. Minnerunngitsumillu: Sulisut sinniisoqarnerannik aallussilluarpoq.

Ilaasortanik kajumissaasiinerit ”Immikkoortortaqarfitsialannillu” toqqaanerit tamarmik SIK-p siulersuisuunerinit aalajangiiffigineqartarput immikkoortortaqarfiit siunnersuuteqarnerisigut.