X
GO
da-DKkl-GL
SIK
Nakkutillisoqarfiup ataatsimiinnissaa sulisullu sinniisaasa pikkorissarnissaat corona pissutigalugu kinguartinneqarput

12. marsi 2020: Nakkutilliisoqarfiup marsip 26-ani ataatsimiinnissaralua ukiamut kinguartinneqarpoq. Sulisullu sinniisaasa pikkorissarnissaat nunamit tamarmit peqataaffigineqartussaagaluaq qaquguussagaluarnersumut kinguartinneqarpoq.

Kattuffimmi ukiut tamaasa pisartoq (ataatsimeersuartoqanngikkaangat), Nakkutilliisoqarfiup ataatsimiinnera, sisamanngornermi marsip 26-ani Nuummi Hotel Hans Egedemi pisussaagaluarpoq. Coronavirusilli nunani tamalaani tunillaassuunnera akornusiivoq — ataatsimiinnissaagaluaq ukiamut kinguartinneqarpoq.

Navianartoqarnera SIK-p siulersuisuunerisa tusaanngitsuusaarusunngilaat. Piffissamilu aggersumi nalunarumaanngilaq Nakkutilliisoqarfik 2020-p ukiaanerani qaqugorpiaq ataatsimiisinneqassanersoq. Aammami sinerissamit tamarmit aallartitat katersuunnissaat iluatsillugu allanik pilersaaruteqartoqaraluarmat, soorlu pikkorissarnissamik SIK-llu aaqqissuussaanera pillugu isumasioqatigiinnissamik.

Siulersuisuunerit nalunaarutaat oqaluuserisassanut aalajangersimasumik ilaasarpoq, oqallisissaqarluartitsigajuttoq. Tamatuma saniatigut immikkoortortaqarfiit periarfissaqarput oqaluuserisassanik ilanngussaqarnissaminnut. Periarfissarlu tamanna ukioq manna immikkoortortaqarfiit ilaasa arfinillit atorpaat. Tamakkuali oqallisigineqarnissaat ukiamut utaqqittariaqalerpoq.

Coronap aarlerinartorsiortitsinera aamma sulisut sinniisaasa pikkorissarnissaannik ulluni 16.-19. marsimi Narsarsuarmi nunamit tamarmit peqataaffigineqarluni ingerlanneqartussaagaluamik kalluaavoq. Pikkorissarnissaq, pikkorissarnissat 2020-mi ingerlanneqartussat arlallit ilaat, unitsiinnarneqarallarpoq qaquguussagaluarnersumut kinguartinneqarluni.