X
GO
da-DKkl-GL
SIK
KNI Pilersuisoq nunaqarfinnik inukillisaaqataavoq

10. aggusti 2020: Namminersorlutik Oqartussat KNI Pilersuisoq 100 procentimik pigisarimmassuk kissaatiginarpoq kiffar­­tuussinissamut isumaqatigiissummi KNI piumaffigineqassasoq sulisut ullormut nal. ak. 8-nut aningaasarsialerneqassasut, SIK-p siulittaasua allappoq.

Nunaqarfinni suliffeqarfiit arlalissuit ajuusaarnaraluartumik taamaallaat ullup affaanut suliffiusinnaapput, naak Namminersorlutik Oqartussat iluanni ukiuni kingullerni pitsan­ngoriartoqarsimagaluartoq.

Kisianni soorlu Pilersuisup pisiniarfiini ilaasortarpassuavut taamaallaat ullormut nal. ak. tallimani sulisinneqartarput. Tamatumalu suna kinguneraa? Amerligaluttuinnartut illoqarfimmut nuuttarput nalunaaquttap-akunnerini suliffiusuni nalinginnaasuni ullormut arfineq-pingasuusuni sulisinnaaniassagamik.

Namminersorlutik Oqartussat KNI tamakkiisumik pigisarimmassuk taava oqartariaqarpoq Namminersorlutik Oqartussat peqataasut nunaqarfiit sukkasuumik inuerukkiartornerannut.

Pilersuisumut isumaqatigiinniaraangatta tamatigut kissaatigisarparput pisiniarfinni sulisut il.il minnerpaamik nalunaaquttap-akunnerini arfineq-pingasuni sulisinneqartarnissaat.

Pilersuisulli innersuussutigiuagaa tassaavoq Namminersorlutik Oqartussanut kiffartuussinissamik isumaqatigiissummi akuersissutigineqarsimasoq nunaqarfinni mikinerusuni pisiniarfiit taamaallaat nalunaaquttap-akunnerini tallimani ammatinneqartarnissaat.

Tamanna Namminersorlutik Oqartussat kissaatigigunikku taava soormi toqqaannartumik oqarnianngillat nunaqarfiit inuerukkiartussasut?

Illua’tungatigut ukiut tamaasa tusalissavarput KNI qanoq annertutigisumik sinneqartoor-tar­toq. Taamaattorli sulisuminik ullormut nalunaaquttap-akunnerini 8-ni akissarsiaqartitserusunngilaq.

Namminersorlutik Oqartussat KNI 100 procentimik pigisarimmassuk kissaatiginarpoq kiffar­­tuussinissamut isumaqatigiissummi KNI piumaffigineqassasoq sulisut ullormut nal. ak. 8-nut aningaasarsialerneqassasut – namminneq kissaatigisimanngikkunikku nunaqarfiit inuerukkiaartuaassasut.


Jess G. Berthelsen
SIK-p siulittaasua