X
GO
da-DKkl-GL
Qeqertarsuarmi kaagiliullaqqinneqqusaanneq

 

Ilaasortanik ilaqutaannillu soqutiginnittunillu allanik unnussiuaartitsineq.

 

Una nutaarsiassaanngilaq, tassami siorna 2017-imi oktobarip naalernerani allagarsiussaagami. Kisianni soqutiginaateqarunnaarnavianngilaq, takussutissaagami immikkoortortaqarfiit ilaata qanoq iliorsimaneranik sulisartut peqatigiiffiannut ilaasortanik ilaqutaannillu, nunaqqataasunillu allanik soqutiginnissinnaasunik, katerisimaartitsiniarluni.

Allagarsiussaq ima qulequtaqarpoq: ”Kaagiliullaqqinneqqusaatsitsineq - Kaagiliornermik nuannarisaqarpit? Soqutigisaqarpit? Taava unammisitsinermut peqataasinnaavutit.”

Qaaqqusissut ima nangippoq:

”SIP Qeqertarsuaq ilaasortaminut, ilaqutaannut kiisalu innuttaasunut soqutiginnittunut unnussiuaartitsinissaminut kaagiliornermik unammisitsinialerpoq. Unnussiuaartitsinissaq nereqatigiinnermik aallartittussaq Innuttaasut illuanni [ulloq] [nalunaaqutaq] ingerlanneqartussaavoq. Kaagiliat nereqatigeereernerup kingorna peqataasunit kinguleqqiutigineqarpata mamarineqarnerpaaq toqqarneqassaaq. Ajugaarsorlu pinnatassaqarumaarluni.

Kaagiliornermut peqataarusukkuit kingusinnerpaamik [ulloq] [nalunaaqutaq] nalunaarsinnaavutit. Qeqertarsuarmi SIP-p kaagiliassavit akussai pisiarissuai. Nalunaarfissat: [atit pingasut, mobiltefoniisalu normui] Sianerlutit sms-erlutilluunniit peqataanissat nalunaarutigisinnaavat

Aaqqissuisoq: SIK

Pilersaarut unnussiornissamut tunngasoq kingusinnerusukkut ersarinnerusumik saqqummiunneqassaaq.”

 

 

 


 

Soqutiginninnermut allisaataavoq

Apeqqutigineqarmat unnuk qanoq ingerlasimanersoq Qeqertarsuarmi SIP-p siulittaasua Anda Kristiansen ima akivoq:

Kaagiliullaqqinneqqusaanneq innuttaasunit soqutigineqarluarpoq. SIP-p taamatut iliuuseqarnera Qeqertarsuarmiunut sulisartoqarnerup tungaatigut eqiiallaatigineqartoq malunnarpoq, arlalitsigut malunnaateqarpoq. Ilaasortaaginnarnertik akileraaginnarnertillu iluaqutitaqartarnersoq ilaatigut apeqqutinngortittarpaat. Matumanili kaagiliaminnik unamminerminni malugaat aamma namminneerlutik ilaasortaanerminni iliuuseqaqataasinnaallutik.

Tamatuma kingorna marlussoriarluni taamatut katerisimaartitsisoqarpoq, kingullermik juunip sisamaani 2018 ukiumoortumik ataatsimeersuarnermut atatillugu. Unnussiortitsinerit ingerlanneqartalernerisigut malunnarpoq ilaasortat soqutiginninnerat annertuninngortoq.

Ukiuni siuliini  SIP Qeqertarsuaq allaat peqatigiiffittut unilluinnangajassimagaluarpoq. Ilaasortat maajip aallaqqaataasiornermi imaluunniit ukiumoortumik ataatsimeersuarnerminni taamaallaat ataatsimoorsinnaasarsimapput.

Allaat ukioq manna 2018-mi SIP Qeqertarsuup ataatsimeersuarnera ilaasortanit 35-nit peqataaffigineqarpoq, amerlanerusinnaasimagaluarpullu, tassa ilaarusukkaluit ilaat pissuteqartumik peqataanngitsoormata.

 

Qupperneq pilersinneqarpoq: 19-07-2018