X
GO
da-DKkl-GL
SIK
Isumaginninnermut aningaasaateqarfiit

Isumaginninnermut aningaasaateqarfiit qinnuteqarfigalugit tapiissuteqarsinnaasut pillugit paasissutissat tunngaviusut quppernermi maaniipput. Suut qinnutigineqarsinnaanerat kikkullu qinnuteqarsinnaanerat.

Qinnuteqarnermi immersugassaq

 

Nalinginnaasumik

SIK sulisartut kattuffiattut suliffeqarfinnik namminersortunik pisortanullu atasunik isumaqatigiissuteqarpoq isumaginninnermut aningaasaateqarfeqarnissamik. Aningaasaateqarfiit taakku assigiimmik periarfissiipput peruluutaasumik nappaateqalernermi ikiorserneqarsinnaanermik tassa angalanermi ingiaqatigineqarnissamut ineqarnissamullu akiliunneqarnissamik kiisalu sulinngikkallarnermi aningaasarsiassaraluanik annaasanut matussutissinneqarnissamik.

Suliffeqarfiit quppernermi maani allattorneqarsimasut aningaasaateqarfinnut taakkununnga akiliuteqartarput.

Tassa suliffeqarfiit taakkua ilaanni sulisuugaanni akiliunneqarnissamik qinnuteqartoqarsinnaavoq qanigisaq perululluni napparsimalersimappat imaluunniit nammineq perululluni napparsima­­­­lersimagaanni napparsimmavimmut tassanngaanniillu uterluni angalanermi qanigisamit ingiaqatigineqarnissamut, napparsimmavimmiinnermilu najorneqarnissamut.

Aamma ingiaqatiginnittup su­lin­ngikkallarnermini ani­ngaasarsiassaraluaminik annaasaminik matussutissinneqarnissaa qinnutigineqarsinnaavoq.

Aammattaaq meerarisaq imaluunniit meerarisat najugarisamut qimanneqartariaqalissappata ingiaqataasumut angalaqataatinnissaat periarfissaqarpoq, apeqqutaalluni meeqqat qassinik ukioqarnersut.

Aningaasaateqarfiit amerlanerit aamma isaruartaarnissamut imaluunniit isarussanik nutarterinissamut tapiissuteqartarput.

Qinnuteqarnialersinnalli paasissutissat piumasarisallu pillugit maani allassimasut atuaqqaarallakkit.

 

Kikkut qinnuteqarsinnaappat?

Aningaasaateqarfinnut tamanut atuuppoq SIK-p isumaqatigiissutai malillugit sulisuusut aningaasaateqarfinnut sulisitsisup akiliioraaffigisaanut qinnuteqarsinnaanerat.

Tamanna eqqaassanngikkaanni aningaasaateqarfimmit aningaasaateqarfimmut aalajangersakkat assigiinngissuteqarput (juunimi 2020-mi aningaasaateqarfiit tallimaapput): Namminersorlutik Oqartussat kommunillu aningaasaateqarfiannut qinnuteqarsinnaapput SIK-p isumaqatigiissu­­tai malillugit sulisuusut tamarmik. Suliffeqarfiit ilaasa Namminersorlutik Oqartussat kommunillu aningaasaateqarfiat ilannguffigisimavaat. Aningaasaateqarfiit allat piumasaraat qinnuteqarniaraanni SIK-mut ilaasortaanissaq.

Takukkit paasissutissat qulequttap uuma ataaniittut: ”Isumaginninnermut aningaasaateqarfiit tallimaasut”.


Sunik qinnuteqartoqarsinnaava?

Ukununnga aningaasaliissutissanik qinnuteqarsinnaavutit:

  • Qanigisamik perululluni napparsimasumik najuilluni sulinngikkallarnermi akissarsiatigut annaasaqaatitit.
  • Ineqarneq – hotelimi allamiluunniit.
  • Angalanermut aningaasartuutit – timmisartumut il.il. bilitsinut.
  • Danmarkimi rejsekorti.
  • Qanigisap ilerrata imaluunniit qummuattap nunatsinnukaanneqarnera.
  • Isaruartaarnissaq (aningaasaateqarfiit amerlanerit periarfissaqartitaat – apeqqutigiuk periarfissaqarnersoq).

 

Kikkut qanigisaappat?

Qinnuteqartup qanigisai ukuupput:

  • Angajoqqaat
  • Aapparisaq
  • Inooqatigisaq (sivikinnerpaamik ukiumi ataatsimi)
  • Meeqqat
  • Qatanngutit

 

Qaqugu qinnuteqaat akuerineqassava?

Qinnuteqaatit takkuttut nukinginnartutut suliarineqartarput - isarussanulli tunngatillugit qinnuteqaatit suliarineqarneri sivisunerusinnaasarput.

Corona-p nalaani angalanerit
Nunatsinnit nunatsinnullu angalanernut tunngatillugu aalajangersakkat inassutillu sukkulluunniit atuuttut maluginiakkit. Pissutsit malinnaaffigikkit Nunatsinni Nakorsaaneqarfiup COVID-19 pillugu nittartagaani: Kalaallit Nunaannut angalaneq
 


 

Uppernarsaatit pingaaruteqarput

Qinnuteqaatit suliarissagutsigu qinnuteqarnermi immersugassap (quppernermi maani pineqarsinnaasup) immersorneqarsimasup saniatigut uppernarsaatinik assigiinngitsunik pisariaqartitsissaagut:
Nakorsamit uppernarsaat
• Sulisitsisup tapiinissamut/matussusiinissamut itigartitsissutaa
Akissarsiat allagartaat kingulliit pingasut
Najugarisamut allagartaq
 


 

Malugiuk aamma

Qinnuteqaatinnut tunngatillugu paasisaqarnerorusukkutta attavigissavatsigit.

Qinnuteqaatinik suliarinninnivut sapinngisamik assigiissaarniartarpavut – soorluli takusinnaagit, isumaginninnermut aningaasaateqarfinnik isumaqatigiissutit imarisamikkut assigiinngissuteqalaartarput.

SIK-mut saaffigiinniinnarina nalornissuteqaruit apeqqutissaqaruillu.

 

Isumaginninnermut aningaasaateqarfiit tallimaasut

Malugiuk suliffeqarfiit allat arlallit isumaginninnermut aningaasaateqarfinnut ataasiakkaanut akiliisarnissaannik isumaqatigiissuteqarfigineqarsimammata. Tamanna matuma ataani takuneqarsinnaavoq.

• Namminersorlutik Oqartussat kommunillu isumaginninnermut aningaasaateqarfiat: Suliffiit Namminersorlutik Oqartussat, kommunit aamma Danmarkip naalagaaffiata ataaniittut, kiisalu: Tele Greenland, Nukissiorfiit, KNR, Royal Arctic Line, Hotel Arctic, Nuup Bussii, Nuuk Imeq, Maniitsoq Fish aamma Avannaa Seafood.

• Grønlands Erhvervip (GE) isumaginninnermut aningaasaateqarfia: Suliffeqarfiit GE-mut ilaasortaasut ilaat aningaasaateqarfimmut akiliisartut. Malugalugu aningaasaateqarfik taanna isarussanut tapiissuteqarneq ajormat.

• Royal Greenlandip isumaginninnermut aningaasaateqarfia: Taassumunngattaaq ilaapput Polar Seafood aamma Upernavik Seafood.

• KNI-p isumaginninnermut aningaasaateqarfia: Tassunga ilaapput Pilersuisoq, Polar Oil, Neqi, KNI Engros aamma Pisisa.

• Polar Raajat isumaginninnermut aningaasaateqarfiat: Tassunga ilaapput suliffeqarfiup fabrikkiutai.

 

Attaveqarfissat, ilitsersuutit paasissutissallu

Isumaginninnermut aningaasaateqarfiit ataasiakkaat periarfissarititaat pillugit apeqqutissaqaruit SIK-mut saaffiginnissinnaavutit, tlf. 32 21 33, e-mail socialfonden@sik.gl
SIK-p allattoqarfiata ammasarfiisa nal. 9.00-imit 13.00-imut avataatigut aamma pingasunngornikkut saaffigineqarsinnaapput: Dana Dahl, toqqaannartumik tlf. 34 93 17, imaluunniit Inge-Marie Rosing, toqqaannartumik tlf. 34 93 11.

Nappaatit peruluutaasut allattorsimaffiat (Namminersorlutik Oqartussani tunngavigineqartartoq, taamalu aamma Isumaginninnermut Aningaasaateqarfimmi). Nammineq kalaallisuunngortitarput. Una tooruk anillatsikkumallugu

Qinnuteqaatit qanoq pineqartarnerat qinnuteqartullu pisinnaatitaaffii pillugit allakkiaq paasissutissiissut uani aajuk

Naqitaaraq "Peruluutaasumik napparsimalernermi ingiaqatigineqarneq" anillatsitassaq pingasunngorlugulu pertiterlugu (juulimi 2020 saqqummersinneqartoq)

Video paasissutissiissut takorusukkukku una tooruk:
Erseqqissarneqassaaq videomi oqaatigineqartoq qinnuteqassagaanni SIK-mut ilaasortaanissamik piumasaq atuutinngimmat Namminersorlutik Oqartussat kommunillu isumaginninnermut aningaasaateqarfiannut suliffeqarfinnullu allanut tassunga akiliisartunut. Video paasissutissanik erseqqissakkanik imalik suliarineqalerpoq.