Skip to content

Atorfeqarnermik uppernarsaateqartarnissaq 1. juulimit inatsisikkut aalajangersagaalissaaq

Sulisut tamarmik sulileqqaarnerminnit atorfeqarnermik uppernarsaateqarnissaat 2025-mi juulip aallaqqaataaniit inatsisikkut piumasaqaataalissaaq. Tamanna atuutissaaq qaammat ataaseq sinnerlugu suliffeqaraanni.

Inatsisip atuutilernera sioqqullugu atorfeqarnermik uppernarsaateqarani suligaanni sulisitsisup uppernarsaammik taamaattumik tunniussinissaa piumasarineqarsinnaatitaavoq.
Inatsisip taaguutigaa ”Sulisitsisup sulinermik inuussutissarsiuteqartumik atorfeqarnermi atugassarititaasut pillugit ilisimatitsisussaaneranut Inatsisartut inatsisaat (atorfeqarnermik uppernarsaasarnermut inatsit)”. Inatsit 2022-mili Inatsisartuni isumaqatigiissutigineqaraluarpoq, qaquguli atuutilernissaa aalajangerneqarani. Taavali 2024-mi juullinngitsiartoq suliffeqarnermut naalakkersuisoq Jess Svane nalunaaruteqarpoq inatsit 1. juuli 2025-mi atuutilissasoq.

Nutaarsiassaq sulisartunut pingaaruteqartoq

Atorfeqarnermik uppernarsaatit ullumikkut suliarineqartartut takusartakkatta ilaat imarisamikkut amigaatilerujussuusinnaasarput. Taamaattumik inatsit nutaaq nunatsinni sulisartorpassuarnut nutaarsiassaavoq pingaaruteqartoq. Pingaartumillu nammineq suliffiutilinni sulisunut pingaaruteqarpoq, namminersortuni sulisut ilarpassui atorfeqarnerminni allagartaqartinneqarneq ajormata. Soorunami neriuutiginarpoq inatsisitaarnikkut tamanna pitsaanerulerumaartoq.

Atorfeqarnermik uppernarsaammi ilisimatitsissutigineqartussat inatsimmi minnerpaaffissalerneqarput:

Ilaatigut allassimassaaq suliassat suunersut imaluunniit atorfiup suna taaguutigineraa, aamma atorfeqarnerup qanga aallartinnera. Sulisup pisinnaatitaaffii allanneqassapput soraarniarnermut soraarsitsinissamulluunniit piffissaliinerit eqqarsaatigalugit, minnerunngitsumillu sulinngiffeqarnermi akissarsiaqartitsisoqassanersoq aamma nalunaarneqassalluni. Tassa atorfeqarnermk uppernarsaatip aalajangersimasumik imarisassai immikkoortut qulit inatsimmi taagorneqarput. (Inatsit e-mailimut matumunnga kakkiupparput).

SIK maannamut qanoq iliorsimanersoq

Inatsimmik taamaattumik atuuttoqannginnerani SIK iliuuseqarniarsimavoq atorfeqarnermik uppernarsaatit qanoq imaqartariaqarnerannik ilisimatitsisarluni. Tamanna ilaatigut pivoq SIK-p nittartagaani eqqaamasassanik paasissutissiinikkut.

Paasissutissat taakku uaniipput: ”Paasissutissat” > ”Apeqqutigineqarajuttut”: Apeqqut nr. 1”Atorfinitsitaanermut isumaqatigiissutima misissornissaanut ikiorneqarsinnaavunga?”, aamma apeqqut nr. 2 ”Sulisitsisora atorfinitsitaanermut isumaqatigiissummik allagaqarusunngilaq. Qanoq iliussaanga?”

Nittartakkami allassimasut piaarnerpaamik iluarsalluarneqarumaarput atorfinitsitaanermik uppernarsaatit qanoq imaqartinneqarnissaannik inatsisikkut piumasarineqartunut naapertuuttunngorlugit.

Ukiut 20-ngajaat utaqqineqarpoq

Taamatut inatsisiliortoqarnissaanik pisariaqartitsineq kissaateqarnerlu ukiut 20-nngulersut matuma siornatigut SIK-p siulittaasuanit Jess G. Berthelsenimit saqqummiunneqarpoq – politikerinut kajumissaarinikkut oqaloqateqarnikkullu, soorlumi siulittaasoq taamaaliortartoq.

Tamanna aallartippoq partiip Siumup allaffiani oqaloqatigiinnikkut. Politikkikkut tunngaviusumik suliniuteqarneq taamaalilluni aallartippoq. Taavali 2009-mi Inatsisartunut qinersisoqartussanngorpoq, suliarlu unikkallarpoq.

Ukiuni tulliuttuni SIK arlaleriarluni naalakkersuisoqarfinnut akisussaasunut assigiinngitsunut tuavisaaruteqartarpoq. Kiisamilu 2022-mi inatsit akuersissutigineqarpoq. Inatsisilialli qaqugu atuutilernissaa ilaannikkut ingerlaannaq aalajangerneqarneq ajorpoq, nalunaarutikkut kingorna aalajangerneqartartussanngortinneqartarluni. Nalunaarullu taamaattoq 20. decembari 2024 atsiorneqarpoq.

Inatsisip qaqugu atuutilernissaanik nalunaarut – una tooruk 
Atorfeqarnermik uppernarsaateqartarnissaq pillugu inatsit – una tooruk