Skip to content

Ilaqutariit 403-t angalanissamut makitaapput

SIK-p Sulinngiffeqarluni Angalanermut Aningaasaateqarfiata siulersuisui aalajangerput 2018-imi sulinngiffeqarluni angalanissanut 8,2 mio. kr.-it aningaasaliissutigineqassasut.

Tamanna aalajangerneqarpoq siulersuisut septembarip 14-iani ataatsimiinneranni. Taavalu septembarip 20-ani makitsinermi ilaqutariit 403-t 2018-imi Kalaalliit Nunaanni imaluunniit Danmarkimi angalanissaminnut makitaapput.

Sulinngiffeqarluni Angalanermut Aningaasaateqarfimmut qinnuteqarsimasut tamarmik akissutisiassaat sapaatip-akunnerani uani allakkerisarfikkut nassiussorneqassapput.

Angalanissanik makitsisuupput Nuummi sulisut sinniisaat sisamat ukuusut: Simon Christiansen, Louise Kordon, Jens Kristian Kâjangmat aamma Antoinette Davidsen. 

Makitanik nalunaarsuisuupput SIK-mi saaffiginnittarfimmi sulisoq Inge Lennert aammalu tassani praktikanti Nina Fleischer. Sermersuup Eqqartuussiviani eqqartuussisunngorniaq Pia Hjort Andersen makitsinermi nakkutilliisutut najuuppoq. Makitsisitsisuuvoq aningaasaateqarfiup allattaa Inger Heilmann Larsen, taassumalu assilisai quppernermi maani takutinneqarput. 

Una tooruk Sulinngiffeqarluni Angalanermut Aningaasaateqarfik pillugu paasissutissat qupperumallugit.

Makitsinermik nakkutilliisoq Pia Hjort Andersen (nikorfasoq) makitsinermut malinnaaqqissaarpoq.
Sulisut sinniisaat sisamat (assilissami salliusut) makitsipput. Saamerlermiit: Antoinette Davidsen, Simon Christiansen, Jens Kristian Kâjangmat aamma Louise Kordon.
SIK-p allattoqarfiani sulisut Inge Lennert aamma Nina Fleischer ilaqutariit 403-t 2018-imi qilanaarutissaannik angalanissanik makitsinermi nalunaarsuisuupput.