SIK-p isumaqatigiissutai malillugit akissarsiaqartut ukiut tamaasa periarfissinneqartarput kattuffiup sulinngiffeqarluni angalanermut aningaasaateqarfianut qinnuteqarnissaminnut, taamalu aappaaguani angalanissanik makitsinernut peqataanissaminnut.
Ukiaq manna makitsisoqareerneratigut ilaqutariit 469-it 2019-imi akiliunneqarlutik angalanissaminnut qilanaarsinnaanngorput.
Piffissap qinnuteqartitsiviusup ingerlanerani maajip aallaqqaataata aggustillu aallaqqaataata akornanni qinnuteqaatit katillugit 3912-it SIK-p tiguai. Taakkua ilaat 3098-it atorsinnaapput aningaasaateqarfimmi malittarisassat naapertorlugit. Sinneri atorsinnaasimanngillat assigiinngitsut pissutigalugit, soorlu ukiut kingullit sisamat ingerlaneranni makitaareersimaneq pissutigalugu.
Makitsineq pivoq SIK-p illuani. Nuummi sulisut sinniisaasa ilaat pingasut uku makitsisuupput: Juaanna Steenholdt, Helene Schmidt aamma Jerine Egede. Makitsinerullu eqqortumik torersumillu pinissaanik nakkutilliisutut najuuppoq eqqartuussisoq Johanne Banke Thorup.
Allakkat makitaasimanermik ilisimatitsissutaasut pineqartunut nassiussuunneqareerput.
SIK-p aningaasaateqarfiata siunertaraa sulinngiffeqarnerminni angalaniartunut bilitsinik akiliussisarnissaq. Tamatumunnga periarfissaqassagaanni SIK-p isumaqatigiissutai malillugit sulisuusariaqarpoq, sulisitsisorlu aningaasaateqarfimmut akileeqataasartuusariaqarpoq. Sapinngisamillu amerlasuut periarfissaqarniassammata ukiut kingulliit sisamat ingerlaneranni makitaasimagaanni makitsinermi peqataasinnaanngikkallartarnissamik malittarisassaqarpoq.
SIK-p sulinngiffeqarluni angalanermut aningaasaateqarfia pillugu paasissutissat uani atuarneqarsinnaapput.
Inussiarnersumik
Ludvig Larsen
SIK-p siulittaasuata tullia aningaasaateqarfimmilu siulittaasoq
