Ukiumi feeriarfiusumi 2026-ni angalanissanik Ferieondimi makitsisoqaqqammerpoq. Qinnuteqaatit atorsinnaasut 656-it makitsinermi peqataatinneqarput, taamalu inuit 258-it makitaallutik.
Tamatuma saniatigut qinnuteqartut ilaat utaqqisunut ilanngunneqarput, taamaalillutik makitaasimasut ilaat angalanissaminnik atuinngitsuussagaluarpata angalanissaminnut periarfissaqalerlutik.
Pisarnertut makitsineq eqqartuussisumik alatsinaattoqarluni ingerlanneqarpoq, aammalu sulisut sinniisaasa ilaat marluk makitsinermi ikiortaapput.
Qulaani asseq:
Saamerlermit: Sulisut sinniisaat Gustav Mathiesen, SIK-mi receptionisti Inge Lennert, kredsdommer Kristine Olsvig aamma sulisut sinniisaat Frederik Henningsen.
Qinnuteqarsimasut tamarmik tallimanngormat oktobarip 17-iani sms-erfigineqarput makitaasimanerannik imaluunniit makitaasimannginnerannik.
Feriefondip siulittaasuata Jokum Zeebip nuannaarutiginerarpaa aamma 2026-mi ilaqutariippassuit nuannaarutissarsimmata Kalaallit Nunnaanni, Danmarkimut imaluunniit Islandimut feeriarlutik angalanissaminnik.