Pikkorissarnerit sulisut sinniisaannut sulisartoqarnermullu nukittorsaatit.
2025-mi pikkorissarnissanut pilersaarutit
Tunngaviusumik pikkorissarnerit
Sap. ak. 7 (10.-14. februaari) Pikkorissarfik: Sulisartut Højskoliat, Qaqortoq
Nalunaarfissap killinga: 24. januaari 2025
► Qinnuteqarsinnaaneq matuvoq
Sap. ak. 21 (19.-23. maaji) Pikkorissarfik: Hotel Arctic, Ilulissat
Nalunaarfissap killinga: 22. apriili 2025
► Qinnuteqarsinnaaneq matuvoq
Sap. ak. 41 (6.-10. oktobari) Pikkorissarfik: Hotel Arctic, Ilulissat
Nalunaarfissap killinga: 5. septembari 2025
► Peqataaniarluni immersugassaq – una tooruk
Assigiimmik sulialinnut pikkorissaanerit
Sap. ak. 11 (10.-14. marsi) Pikkorissarfik: Hotel Arctic, , Ilulissat. Peqataatinniakkat: Nalunaaquttap-akunnermusiallit ilinniagallit/ilinniagaqanngitsut
Nalunaarfissap killinga: 23. februaari 2025
► Qinnuteqarsinnaaneq matuvoq
Sap. ak. 26 (23.-27. juuni) Pikkorissarfik: Hotel Arctic, Ilulissat. Peqataatinniakkat: Qaammammusiallit suliassaqarfinnit assigiinngitsuneersut
Nalunaarfissap killinga: 23. maaji 2025
► Peqataaniarluni immersugassaq – una tooruk
Sap. ak. 47 (17.-21. novembari. Pikkorissarfik: Hotel Arctic, Ilulissat. Peqataatinniakkat:
GE-p isumaqatigiissuteqarfiini sulisut sinniisaat
Nalunaarfissap killinga: 17. oktobari 2025
► Peqataaniarluni immersugassaq – una tooruk
Akkorderluni sulinermut aaqqissuussinerit pillugit pikkorissarneq
Sap. ak. 38 (15.-19. septembari) Pikkorissarfik: Hotel Arctic, Ilulissat. Peqataatinniakkat:
Sanaartornermi sulisut assigiinngitsut
Nalunaarfissap killinga: 15. aggusti 2025
► Peqataaniarluni immersugassaq – una tooruk
Pikkorissarnernut tamanut tunngatillugu taasariallit:
- Pikkorissarnerni tamani 25-t tikillugit peqataasoqarsinnaavoq.
- Peqataaniarluni qinnuteqaat kingusinnerpaamik pikkorissarnissaq qaammammik ataatsimik sioqqullugu SIK-mit tiguneqarsimassaaq.
Pikkorissarnerit pillugit saaffigisassaq:
Siunnersorti Marie Kielsen Hansen
e-mail [email protected]
telefoni 32 21 33
Pikkorissartut sumut akiliunneqartarpat?
Qaammarsaanermut Ilinniartitaanermut Aningaasaateqarfiup (QIA) pikkorissaanerinut peqataasoqartillugu ilisimasassat.
QIA-p makku aningaasalertarpai:
- Bilitsit
- Aqqutaani unnuinerit nerisaqarnerillu
- Pikkorissariarfigisami najugaqartitaaneq nerisaqartitaanerlu
- Ullormusiaqartitaaneq (ullormusiat annikinnerpaat)
- Sulisitsisup sulisup angalanermini akissarsiaqannginnissaa aalajangersimappagu akissarsiatigut annaasaqaatit akilernissaat
Sulisut sinniisaannik pikkorissaanerit imaat
Sulisut sinniisaannik pikkorissaanerit nalinginnaasumik immikkoortut marlunngorlugit neqeroorutaapput:
Tunngaviusumik sulisut sinniisaattut sulineq, tunngaviusumik ilisimasassanik tamalaanik pikkorissarfiusoq “Inuttut inerikkiartorneq peqatigiiffilerinermillu paasinninneq” qitiutillugit, aamma
Assigiinnik sulialinnut pikkorissaaneq, Branchekursus ingerlaqqiffiusoq ”Sulisoqarnermi inatsisit isumaqatigiinngissutinillu aaqqiiniartarneq, akisussaaffiit pisussaaffiillu kiisalu sassarsinnaanermut tunngasut” sammillugit.
Taakkua saniatigut Akkorderluni sulinermut aaqqissuussinerit pillugit pikkorissarneq, sanaartornermi sulisunut tunngatitaq, neqeroorutaavoq (quppernerup aterpiaani taanna pillugu suli paasissutissaqarpoq).
Tunngaviusumik sulisut sinniisaattut sulineq
Sammisani qitiusoq: Inuttut inerikkiartorneq, peqatigiiffilerinermillu paasinninneq
Pikkorissarnerup siunertai:
- Sulisut sinniisaasa inerinnerulersinnissaat
- Sulisut sinniisaasa SIK-llu suleqatigiinnerisa nukittorsarneqarnissaat.
- Sulisunut sinniisussattut qinigaarlaat suliassaannut nutaanut piukkunnarsarneqarnissaat.
- Sulisut sinniisaasa suliaqarnerisigut ilaasortat ilaasortaanngitsullu SIK-mut tunngasunik ilisimasaqarnerulernissaat.
- Sulisut sinniisaat ilaasortassassarsiortarnermi ilaasortaareersullu ataavartumik ilaasortaasarnissaannut sunniuteqaqataanerulernissaat.
Pikkorissaanerup kingorna peqataasut makkuninnga ilisimasaqalissapput:
- SIK-p inuiaqatigiinni inissisimanera
- SIK-p kattuffittut katitigaanera
- SIK-p aningaasaateqarfii
- Sinniisutut qanoq inissisimanertik ilisimallualissavaat
- Sinniisutut akisussaaffiit pisinnaatitaaffiillu ilisimalissavaat
- Ilaasortassarsiornissami sakkugineqarsinnaasut ilisimalissavaat
- Suliffeqarfimmi ajornartorsiortoqartillugu qanoq iliuuseqarsinnaaneq ajornartorsiutillu aaqqiivigineqarsinnaanerinik misilittaassapput
- Tapersersortitut inissisimanissaq ilisimalissavaat
- SIK-mi isumaqatigiissutit assigiinngitsut ilisimalissavaat
- Sulisut sinniisaattut sulinerminni ilisimasassat assigiinngitsut pingaaruteqartut ilisimalissavaat.
Tunngaviusumik sulisut sinniisaattut sulinissami ulluni tallimani pikkorissarnermi sammisat:
- Inuttut ineriartorneq
- Attaveqaqatigiinneq
- Aporaannermik iluaqutinngortitsineq
- SIK-mi sulinermi periutsit (aningaasaateqarfiit, inunnik ataasiakkaanik sullissineq)
- Soraarnerussutisiassanik aningaasaateqarfik SISA pillugu paasissutissat
- Kattuffiup sulinera pillugu ilisimasassat sinniisullu sulinermini peqatigiiffinnut Kattuffimmullu periusissai
- SIK-p nittartagaa pillugu ilisimasassat
Peqataasussat: Sulisut sinniisaattut qinigaarlaat.
Pikkorissaaneq sioqqullugu ilisimasaqarfigeriigassanik piumasaqaateqanngilaq.
Pikkorissaariaaseq: Saqqummiinerit, eqqartuinerit, suleqatigiikkaarluni suliaqarnerit, piviusut aallaavigalugit sungiusarnerit / takutitsinerit .
Pikkorissaasut: SIK-mi siunnersortit
Assigiinnik sulialinnut pikkorissaaneq – Branchekursus
Sammisani qitiusut: Sulisoqarnermi inatsisit isumaqatigiinngissutinillu aaqqiiniartarneq, akisussaaffiit pisussaaffiillu kiisalu sassarsinnaanermik periutsit.
Pikkorissartitsinerup siunertaraa:
- Sulisut sinniisaasa SIK-llu akornanni suleqatigiinnerup nukittorsarnissaa.
- Sulisut sinniisaasa suliassaminnik ingerlatsisinnaasunngorlugit pikkorissarnissaat..
- Sulisut sinniisaasa ilaasortassarsiornermi peqataasarnissaanni periusissaannik tuniorarnissaat.
Ulluni sisamani pikkorissarnermi peqataasut makkua pillugit ilisimasaqarnerulissaput:
- Sassarsinnaanermik piginnaanngorsaaneq
- Isumaqatigiissutit pillugit ilisimasassat
- Inatsisit sinniisumut ilisimasaqarfigissallugit pisariaqartut (sulisoqarnermut tunngasut)
- Akisussaaffiit pisussaaffiit
- Ulluinnarni sulinermi atugassarititaasut
Peqataasussat: Pikkorissartitsinermut peqataasinnaapput sulisut sinniisaat ”Tunngaviusumik sulisut sinniisaattut sulineq”-imik naammassinnissimasut.
Pikkorissartitsinerit ilusaat: Saqqummiinerit, suleqatigiikkuutaarnerit, sungiusarnerit, oqallinnerit pisuusaartitsinerillu.
Pikkorissaasussat: SIK-mi siunnersortit
Akkorderluni sulinermut aaqqissuussinerit
Sanaartornermi akkorderluni sulinerup qanoq naatsorsorneqartarnera pikkorissarnermi sammineqassaaq.
Taamaalilluni sulisut akkorderluni sulinermi akissarsiatigut pisinnaatitaaffii erseqqinnerusumik paasisaqarfigineqassapput. 2024-mi Nuummi tamanna pillugu pikkorissartoqarpoq peqataasut pissarsiaqarfigilluagaannik, taamaattumillu 2025-mi taamatut pikkorissaaqqinnissaq iluatinnartinneqarluni.
