SIK-p inuusuttai

Inuusuttut sulisartutut peqatigiikkusuttut katersuuffissaat

Ataatsimeersuarnermit kingullermit: SIK-p Inuusuttaasa 2021-mi ataatsimeersuarneranni peqataasut, saamerlermiit: Sara M. Heinrich, Qaqortoq, Thrune Johansen, Ilulissat, Karen Thorleifsen, Aasiaat, Holga Olsen, Aasiaat, Asasaq Gedionsen, Nanortalik, Peter B. Mølgaard, Ilulissat, Føbe Davidsen, Qaqortoq, Jørgen Vetterlain, Ilulissat, Aqqaluk Karlsen, Qeqertaq, Paula L. Petersen, Qasigiannguit, Naduk A. Qaavigaq, Qaanaaq, Inge Q. Alataq, Qaanaaq, Monika Svendsen, Aasiaat, Jakobine Uitsatikitseq, Tasiilaq, aamma Ane-Marie Havmøller-Jørgensen, Upernavik..

Siulersuisut

Siulersuisut ulloq 5. oktobari 2021 ataatsimeersuarnermi qinigaasut:

Siulittaasoq Peter B. Mølgaard,

siulittaasup tullia Ane-Marie Havmøller-Jørgensen,
siulersuisunut ilaasortaq Føbe Davidsen,
siulersuisunut ilaasortaq Thrune Johansen,
siulersuisunut ilaasortaq Jakobine Uitsatikitseq.

SIK-p Inuusuttai kikkuuppat?

SIK-p Inuusuttai peqatigiiffittut 2013-imi pilersinneqarput sulisartut kattuffianni ilaasortat inuusuttut ilinniagaqartut suliffeqartulluunniit atugarisaannik sammisaqartussatut.

SIK-mut ilaasortaq 35-t ataallugit ukiulik kinaluunniit aamma SIK-p Inuusuttaanut ilaasortaavoq – suliffeqaruni, suliffissaaleqisuuguni ilinniartuuguniluunniit. Tassa SIK-mut ilaasortat 35-nik ukioqalersimanngitsut tamarmik pisinnaatitaapput SIK-p Inuusuttaanut immikkut iliuuserineqartartunut peqataanissaminnut – tamatumunngalumi tikilluaqqusaangaarlutik.

Inuusuttut peqatigiiffiat aaqqissugaavoq illoqarfinni nunaqarfinnilu attaveqaateqarneq tunngavigalugu. SIK-p Inuusuttai ukiut marlukkaarlugit ataatsimeersuartarput – attaveqaatillu tamarmik immikkut ataatsimeersuarnermut aallartitassamik ataatsimik toqqaasarput.

SIK-p Inuusuttaasa anguniagaat

2019-imi ukiakkut ataatsimeersuarnermi SIK-p Inuusuttaasa malittarisassaat nutaat akuersissutigineqarput. Malittarisassat taakku naapertorlugit peqatigiiffik imaattunik anguniagaqarpoq:

Sulisartut inuusuttut akissarsiatigut atorfeqarnikkullu pitsaasunik sullivinnilu avatangiisinik toqqissisimanartunik atugaqarnissaat sulissutigissallugu.
Ilinniagaqartut ilinniarnerminni pitsaasunik atugaqarnissaat sulissutigissallugu.
Ilinniagaqartut ineqarnikkut atugarisaasa pitsanngorsarneqartuarnissaat sulissutigissallugu.
Inuusuttut suliffeqarnikkut inuuniarnikkullu atugarisaannik inuiaqatigiit ilisimatissallugit.
SIK-p Inuusuttai pillugit atuarfinni, ilinniarfinni suliffinnilu paasisitsiniaasassallutik.
Ilinniartut sulisartullu inuusuttut oqaloqatigiissinniassallugit, taamaalillutik inuusuttut atugarisaannik pitsanngorsaaniarnermi tapersersoqatigiinniassammata.

Inuusuttut innarluutillit atugarisaasa pitsanngorsarneqartuarnissaat sulissutigissallugu.
SIK-mi ingerlatsiviit allat, ilaatigut immikkoortortaqarfiit kattuffiullu allattoqarfia, suleqatigilluarniassallugit, soorlu inuusuttut atugarisaannut tunngassuteqartut SIK aqqutigalugu isumaqatigiinniutigineqartarsinnaanerat siunertaralugu.
Nunani tamalaani sulisartut kattuffiisa inuusuttunut immikkoortortaqarfiinik suleqateqarnissaq, nunatsinni SIK-p Inuusuttaasa sulineranni iluaqutissanik isumassarsiorfigalugu.

► Malittarisassat 5. oktobari 2021-meersut aajumallugit una tooruk

Ilaasortaanermut akiliut

Qaammammoortumik Ilaasortaanermut akiliutit ilivitsut SIK-p najugarisami immikkoortortaqarfiata aalajangigai tunngaviusumik atuupput. Kisianni ilaasortat ilaat, soorlu suliffissaaleqisut aamma ilinniagaqartut, affarmik akiliuteqartarput.