Quppernermi uaniipput makitsinikkut angalanissanik 2024-mi pisussanik qinnuteqarnermut paasissutissat ilitsersuutillu. QINNUTEQARNERMI IMMERSUGASSAQ quppernerup uuma aterpiaaniissaaq piffissami qinnuteqarfiusumi 15. juunimit 1. septembari 2023-mut.
Kikkut qinnuteqarsinnaappat?
Makitsinikkut angalanissanik qinnuteqarsinnaapput SIK-p isumaqatigiissutai malillugit sulisuusut, ukuli ukioq allortarlugu sulinngiffeqarlutik angalanissamut akiliunneqartalersussat pinnatik:
- Niuernermi allaffinnilu sulisut (HK-t) Namminersorlutik Oqartussani, kommunini naalagaaffiullu suliffeqarfiini sulisut
- Meeqqerisut isumaginninnermilu ikiortit socialmedhjælperit socialhjælperillu
- Peqqinnissamut ikiortit
- Oqalutsit nutserisullu
Sulisoqatigiiaat taaneqartut makitsinikkut angalanissanik qinnuteqarsinnaanngillat. Taakku 2023-mi ukiarnerani erseqqinnerusumik paasissutissinneqarumaarput qanoq qaqugulu taamatut angalanissamik qinnuteqarsinnaalerumaarnerannik – allaaserisarli uaniittoq atuarneqarallarsinnaavoq: https://sik.gl/makitsinikkut-angalanissanut-qinnuteqarneq/
Takullugulu tusaruk qanoq qinnuteqassasutit
(video ilitsersuut uanngaanniit isiginnaarneqarsinnaasussaq suliarineqarpoq)
Makitsinikkut angalanerit pillugit nalinginnaasumik
SIK-ip isumaqatigiissutai malillugit akissarsiaqartinneqartut – taakkualu ilaqutaasa qaninnerit – sulinngiffeqarlutik angalanissaannut akiliussinnaanissaat siunertaavoq. Angalanissanik agguaassineq makitsinikkut pissaaq, qinnuteqartut piumasaqaatinik eqqortitsisut peqataatinneqarlutik.
Piffissaq qinnuteqarfiusoq aallartissaaq ulloq 15. juuni naassallunilu ulloq 1. septembari. Taava ukiap ingerlanerani makitsisoqassaaq aappaagu 2024-mi angalanissanik.
Feriefondi sutigut akiliussisinnaava?
Bilitsit sulinngiffeqarluni angalanermut aningaasaateqarfiup akilissavai. Aammali angalanikkut periarfissat aaqqissuussaanerat pissutigalugu najugarisap ornikkallu akornanni aqqutaani unnuisariaqartoqaraangat taakku unnuiffissaannut akiliunneqartassapput.
Ilaqutariit ataatsimoorlutik angalassapput; imaappoq ataatsikkut aallassapput ataatsikkullu uterlutik.
Makitsinermi peqataatinneqassagaanni piumasaqaatit eqqortinneqarsimasussat:
1. Qinnuteqarnermi immersugassaq eqqortumik immersorneqarsimassaaq – taamaanngippat makitsinermi peqataasoqarsinnaanngilaq.
2. Qinuteqartup sulisitsisua aningaasaateqarfimmut akiliuteqartartuussaaq. Taamaanngippat qinnuteqaat atorsinnaassanngilaq. Sulisitsisut akiliuteqartartut allattorsimaffiat quppernermi maaniittoq takuuk.
3. Qinnuteqarnermi uppernarsaatissatut ilanngunneqassapput akissarsiat allagartaat ataaseq aammanajugaqarnermut uppernarsaat.
4. Nammineeerluni qinnuteqarniaraanni 18-inik ukioqalereersimasariaqarpoq.
5. Qinnuteqartoq angalaqatiginiagaalu, tassa aapparisaq katissimasaq/inooqatigisaq qitornallu, najugaqatigiissapput, najugaqarnermut uppernarsaat ilanngunneqartoq naapertorlugu. Najukkami inooqatigiinneq pineqartoq ullormi qinnuteqarfiusumi sivikinnerpaamik ukiumi ataatsimi atuussimassaaq.
6. Qitornat angalaqataasinnaassagunik 2006-imi kingornalu inunngorsimassapput.
7. Qinnuteqartoq ukiut kingulliit sisamat ingerlaneranni Feriefondimit akiliunneqarluni angalanissamut makitaasimassanngilaq.
8. Qinnuteqartoq aapparisami / inooqatigisamiluunniit SIK-p Feriefondianit feriefondimilluunniit allamit ukioq allortarlugu angalanissamut akiliunneqarsinnaatitaanera atorlugu aamma taamatut akiliunneqarsinnaaguni makitsinikkut angalanissamik qinnuteqarsinnaanngilaq.
9. Qinnuteqaat SIK-p nittartagaatigut toqqaannartumik nassiunneqassaaq kingusinnerpaamik ulloq 1. septembari .
Makitsineq:
Sulisitsisut sulinngiffeqarluni angalanermut aningaasaateqarfimmut akileeqataasartut:
Namminersorlutik Oqartussat
Kommune
Naalagaaffik
Tusass
Halibut Greenland
INI A/S
Mittarfeqarfiit
Hotel Arctic
KNI Pilersuisoq
Maniitsoq Fish
Neqi
Royal Arctic Line
Avannaa Seafood
Nuuk Imeq
Royal Greenland
Nukissiorfiit
Nuup Bussii
Arctic Prime Fisheries
Polar Raajat
Air Greenland
Sigguk Uummannaq
SIK/SIP
SISA
Sulisartut Højskoliat
NPK
Rodebay Fish
Knud Rasmussenip Højskolia
Maniitsumi Efterskoli
Aningaasaateqarfiup siulersuisui
Aningaasaateqarfik siulersuisoqarpoq aningaasaatigut tunngavissanik aalajangersaasartunik makitsinernilu peqataanissamut suut piumasaqaatigineqarnissaannik aalajangiisartunik. Siulersuisut ukuupput:
Jokum Zeeb, siulittaasoq (SIK)
Else Jonna Lange, siulittaasup tullia (SIK)
Ludvig Larsen (SIK)
Morten W. Selvejer (Namminersorlutik Oqartussat)
Rikke Frederiksen (Namminersorlutik Oqartussat)