Makitsinikkut angalanerit 

SIK-ip isumaqatigiissutai malillugit akissarsiaqartinneqartut – taakkualu ilaqutaasa qaninnerit – sulinngiffeqarlutik angalanissaannut akiliussinnaanissaat siunertaavoq. Angalanissanik agguaas­sineq makitsinikkut pissaaq, qinnuteqartut piumasaqaatinik eqqortitsisut peqataatinneqarlutik.

Ukuli ukioq allortarlugu / imaluunniit ukiut tamaasa sulinngiffeqarluni angalanissamut akiliunneqarsinnaalersut makitsinermut peqataasinnaanngillat:

• Niuernermi allaffinnilu sulisut (HK-t) Namminersorlutik Oqartussani, kommunini naalagaaffiullu suliffeqarfiini sulisut
• Meeqqerisut isumaginninnermilu ikiortit socialmedhjælperit socialhjælpe­rillu
• Peqqinnissamut ikiortit aamma ikorfartortit
• Oqalutsit nutserisullu
• Teknikerit

Sulisunut ukioq allortarlugu angalanissamut akiliunneqarsinnaasunut taaneqartunut  ilaaguit, imaluunniit aapparisat/inooqatigisat sulisunut taakkununnga ilaappat, makitsinikkut angalanernut qinnuteqarsinnaanngilatit. Tassa ukioq allortarlugu akiliunneqarsinnaajutigaluni makitsinikkut angalanermik pissarsisoqarsinnaanngilaq – taakkua arlaannaat pineqarsinnaavoq.

Piffissaq makitsinermut peqataanissamut qinnuteqarfiusoq aallartissaaq ulloq 16. juuni naassallunilu ulloq 2. septembari. Taava aappaagu 2026-mi angalanissanik ukiap ingerlanerani makitsisoqassaaq .

Feriefondi makitsinikkut angalanernut sutigut akiliussisinnaava?

Bilitsit sulinngiffeqarluni angalanermut aningaasaateqarfiup akilissavai. Aammali angalanikkut periarfissat aaqqissuussaanerat pissutigalugu najugarisap ornikkallu akornanni aqqutaani unnuisariaqartoqaraangat taakku unnuiffissaannut akiliunneqartassapput.

Ilaqutariit ataatsimoorlutik angalassapput; imaappoq ataatsikkut aallassapput ataatsikkullu uterlutik.

Makitsinermi peqataatinneqassagaanni piumasaqaatit eqqortinneqarsimasussat:

1. Qinnuteqarnermi immersugassaq eqqortumik immersorneqarsimassaaq – taamaanngippat makitsinermi peqataasoqarsinnaanngilaq.
2. Qinuteqartup sulisitsisua aningaasaateqarfimmut akiliuteqartartuussaaq. Taamaanngippat qinnuteqaat atorsinnaassanngilaq. Sulisitsisut akiliuteqartartut allattorsimaffiat quppernermi maaniittoq takuuk.
3. SIK sulisitsisullu ilaat aamma isumaqatigiissuteqarsimapput makitsinikkut angalanernut qinnuteqarsinnaassagaanni SIK-mut ilaasortaanissaq piumasaqaataassasoq. Sulisitsisut kikkut taama piumasaqarnersut sulisitsisut makitsinikkut angalanernut akileeqataasartut allattorsimaffianni quppernermi maaniittumi takuneqarsinnaapput.
4. Qinnuteqarnermi uppernarsaatissatut ilanngunneqassapput akissarsiat allagartaat ataaseq aamma najugaqarnermut uppernarsaat. Uppernarsaatit kingusinnerusukkut nassiunneqassappata tamanna pissaaq qinnuteqarnerup kingorna ullut tallimat qaangiutsinnagit e-mailimut uunga: [email protected]
5. Nammineeerluni qinnuteqarniaraanni 18-inik ukioqalereersimasariaqarpoq.
6. Qinnuteqartoq angalaqatiginiagaalu, tassa aapparisaq katissimasaq/inooqatigisaq qitor­nal­lu, najugaqatigiissapput, najugaqarnermut uppernarsaat ilanngunneqartoq naapertorlugu. Najukkami inooqatigiinneq pineqartoq ullormi qinnuteqarfiusumi sivikinnerpaamik ukiumi ataatsimi atuussimassaaq.
7. Qitornat angalaqataasinnaassagunik najugarisamit aallarnermi 18-inik ukioqalereersimassanngillat.
8. Qinnuteqartoq ukiut kingulliit sisamat ingerlaneranni Feriefondimit akiliunneqarluni angalanissamut makitaasimassanngilaq.
9. Qinnuteqartoq aapparisami / inooqatigisamiluunniit (sivikinnerpaamik ukiumi ataatsimi adresseqatigalugu najugaqatigisimasap) SIK-p Feriefondianit feriefondimilluunniit allamit ukioq allortarlugu angalanissamut akiliunneqarsinnaatitaanera atorlugu aamma taama­tut akiliunneqarsinnaaguni makitsinikkut angalanissamik pissarsisinneqarsinnaanngilaq.
10. Ukioq allortarlugu SIK-p Feriefondianit imaluunniit feriefondimit allamit akiliunneqarluni angalanissamut pisinnaatitaagaanni makitsinikkut angalanissamik qinnuteqartoqarsinnaanngilaq.
11. Qinnuteqaat SIK-p nittartagaatigut toqqaannartumik nassiunneqassaaq kingusinnerpaamik ulloq 2. septembari 2025 nal. 12.00.
12. Bilitsit tamarmik pisiarineqarsimassapput aallarnissaq kingusinnerpaamik qaammammik ataatsimik sioqqullugu.

Maluginiarneqassaaq angalanermut aningaasaliissut atunngitsuussallugu nalunaaruteqanngik­kaan­ni aningaa­saa­teqar­fimmit aningaasaliiffigineqarsinnaaneq ukiuni sisamani annaaneqartarmat.

Makitsineq:

Makitsineq 2025-mi ukiakkut pissaaq. Qinnuteqartut tamarmik kingusinnerpaamik 1. decembari sms-erfigalugit akineqassapput. Akissut tassaasinnaavoq angalanissamut makitaasimaneq imaluunniit makitaasimannginneq.

► Ornigassaq qaqugu allanngortinneqarsinnaava? Una tooruk paasissutissaq aajumallugu