Qinnuteqarnermi immersugassaq quppernerup ataaniippoq. Kisianni paasissutissat maleruagassallu quppernermi maani pineqarsinnaasut atuaqqaatsiakkit.

SIK-p isumaqatigiissutai malillugit sulisuusut ilarpassui 2024-mi akiliutitillutik sulinngiffeqarlutik angalanissaminnut decembarip aallaqqaataanit qinnuteqarsinnaalissapput. Tassani pineqarput sulinermik inuussutissarsiuteqartut ilaat uku SIK-p sulissutiginninneratigut ukioq allortarlugu akiliutitillutik angalanissamut pisinnaatitaalersut:

• Niuernermi allaffinnilu sulisut (isumaqatigiissut nr. 315).
  (Kalaallit Nunaanni Niuernermi Allaffinnilu sulisut Namminersorlutik Oqartussani, Naalagaaffimmi, Tusass A/S-mi, A/S Inissiaatileqatigiiffik INI-mi aam­malu kommunini suliffillit, isumaqatigiis­sutinut allanut attuumassuteqanngitsut.)
• Meeqqerisut isumaginninnermilu ikiortit (isumaqatigiissut nr. 326).
  (Sulisut meeqqerisutut, isumaginninnermilu ikiortitut ilinniarsimasut, Namminersorlutik Oqartussani kommuninilu atorfinitsinneqartut, isumaqatigiissutinullu allanut attuumassuteqanngitsut.)
• Peqqinnissamut ikiortit aamma ikorfartortit (isumaqatigiissut nr. 336).
  (Peqqinnissamut ikiortit aamma ikorfartortitut ilinniarsimasut, Kalaallit Nunaanni Namminersorlutik Oqartussani kommuninilu atorfinitsinneqartut, isumaqatigiissutinullu allanut attuumassuteqanngitsut.)
• Oqalutsit nutserisullu (isumaqatigiissut nr. 367).
  (Oqalutsit nutserisullu Namminersorlutik Oqartussani, Naalagaaffimmi, Tele Greenland A/S-mi, A/S Inissiaatileqatigiiffik INI-mi, kommunini Naalagaaffimmilu suliffillit qaammammusiaqartillugit atorfinitsinneqartut, isumaqatigiissutinullu allanut attuumassuteqanngitsut.) 

Sulisunut taakkununnga ilaaguit illit ilaquttatillu ukioq allortarlugu sulinngiffeqarluni angalanissamut akiliunneqarnissamut pisinnaatitaavusi tamatumunnga piumasaasut naammassisimagukkit – siusinnerpaamilli 1. apriili 2024-mit taamatut angalasinnaalissallutit. Taavalu isumaqatigiissutitigut pisinnaatitaaffiit tamanna atorusukkukku qinnuteqarnermi immersugassaq aalajangersimasoq nittartakkakkoortoq immersussavat. Immersugassaq taanna SIK-p nittartagaani decembarimi ammarneqassaaq.

Angalanissamut taamatut qinnuteqarnermi uppernarsaatissat uku ilanngunneqassapput:

• Akissarsiat allagartaat kingulleq.
• Inoqutigiit najugaqarnermut uppernarsaataat.
• Atorfinitsitaanermi isumaqatigiissut.