SIK siulittaasua eqqarsaatissiivoq: Qanormitaava aalisarnermik inuussutissarsiuteqartut igissagaluarpaat SIK kajumissaarisuuppat Kinamiit aalisartunik tikisitsisoqassasoq Qaqortumi ilaasortavut suliffissaqarniassammata, taamaasillunilu aalisakkanik tulaassuisoqarniassammat?
Siullermik erseqqissaatigissavarput taakkua inuit pineqartut kineserit pineqanngimmata, kisiannili tikisitsisoq – tassalu Royal Greenland, aammalu tikisitsinissamut akuersisimasut, tassaasut kommunit aammalu naalakkersuisut pineqarmata. Ilaatigullu aamma aalisartut kajumissaarisimasut ilisimavara.
Aap, imaassinnaavoq sumiiffiit ilaanni sulisussanik amigaateqartoqartoq, kisiannili sumiiffiit ilaanni aamma suliffissaaleqisoqaqaaq. Tassami nunarput maannakkut 10 procent tikingajallugu suliffissaaleqiffiuvoq. Taamaakkaluartoq avataaninngaanniit ilinniarsimanngitsunik tikisitseqattaarpugut fabrikkini sulisussanik. Tamannalu ataasiaannarnanga Inuiaqatigiittut ajorsarnertut oqariartuutigisarpara.
Maannakkunaasit kingumut suli aamma kineserinik tikisitsinissaq siunniunneqarpoq. Immaqa naggataatigut kineseriinnarnik sulisoqalissaagut uagullu nunatsinni isiginnaartuinnanngorluta.
Ilisimavara nalunagulu taakkua kineserit pineqartut SIK-mi isumaqatigiissutigut naapertorlugit aningaasarsiaqartinneqartut. Kisianni tamatuma saniatigut qanorpiaq isumaqatigiissuteqarfigineqarsimanersut ilisimanngilarput. Soorlu assersuutigalugu fabrikkini tunisassiassaarukkaangat SIK-mi ilaasortavut erngerlutik angerlartinneqartarput. Taava maluginiarneqarsimavoq kineserit angerlartinneqarneq ajortut. Imaassimanerpa kineserit taamatut isumaqatigiissuteqarfigineqarsimasut?
Qanormitaava issagaluarpa nunaqavissut sinerissameersut sumiiffinni Royal Greenlandip fabrikkiinut suliartorniartut aamma taamatut isumqatigiissuteqarfigineqartaraluarunik – assiliaq taava allarluinnaassava?
Soorlu allakkiga ilisimallugu aalisartut ilaat kajumissaarisimasut kineserinik tikisitsisoqarnissaanik – tassa tunisisinnaaniassagamik.
Maannakkut ajoraluartumik Qaqortumi fabrikki matoqqavoq aalisakkanik tulaassuisoqanngimmat.
Qanormitaava aalisarnermik inuussutissarsiuteqartut igissagaluarpaat SIK kajumissaarisuuppat Kinamiit aalisartunik tikisitsisoqassasoq Qaqortumi ilaasortavut suliffissaqarniassammata, taamaasillunilu aalisakkanik tulaassuisoqarniassammat?
Jess G. Berthelsen
SIK-p siulittaasua