Katersuunnissanut killilersuutit corona pissutigalugu atuuttut pissutigalugit SIK-p Nakkutilliisoqarfiata ataatsimiinnissaa kinguartinneqaqqittoq SIK-p siulittaasuata tulliata nalunaarutigaa.
SIK-p Nakkutilliisoqarfia (ukiut sisamakkaarlugit ataatsimeersuarnerit akornanni ukiumoortumik immikkoortortaqarfinnit tamanit peqataaffigineqartumik ataatsimiittartoq) ukioq manna marsip naalerneranili ataatsimiittussaasimagaluarpoq. Taava corona nalorninartorsiortitsilermat kinguartinneqarallarpoq, aasalerneranilu ullulerneqarluni septembarip 18-ianni Nuummi pisussanngorlugu.
Namminersorlutik Oqartussat katersuunnissamut killililersuutaagallartut pillugit nalunaarutaat nr. 28, 31. juuli 2020-meersoq – 2. aggusti 2020-mit atuutilersoq – naapertorlugu illup iluani aaqqissuussinernik kommuninit assigiinngitsunit aggersunit peqataaffigineqartunik ingerlatsinerit inerteqqutaapput.
Taamalu ullumi SIK-p siulittaasuata tullia Ludvig Larsen kattuffiup immikkoortortaqarfiinut nalunaaruteqarpoq ataatsimiinnissaq piffissaligaanngitsumik kinguartinneqartariaqalersoq inuit katersuuttarnerinut killilersuutit atuuttut coronavirusip siaruatsaaliorneqarnissaa pillugu aalajangersagaasimasut taakku pissutigalugit.
“Tassalu Nakkutilliisoqarfiup ataatsimiinnissaa tassungalu atatillugu pikkorissartoqarnissaa kommuninit assigiinngitsunit pisut ataatsimut katersuunnerisigut ingerlanneqartussatut pilersaarutaagaluarmat tamanna pisinnaajunnaarpoq,” Ludvig Larsen allappoq.
Ataatsimiinnissaq kinguartinneqartoq pillugu siulersuisuunerit kingusinnerusukkut erseqqinnerusumik ilisimatitsiumaarput.