Nuummi mittarfimmi terminali nutaaq ulloq 17. juuni 2024 ammarpat piffissaq sioqqulluarlugu aallariartortarnissaq suli pingaaruteqarnerulissaaq – tassa aallarfissaq minnerpaamik nalunaaquttap-akunnerinik marlunnik sioqqullugu. Tamanna atuutissaaq tamanut nunatta iluani angalaniartunut, Nuummi akunnittunut nunanullu allanukarniartunut.
Mittarfeqarfiit taama ilisimatitsissuteqarput. Tamannalu SIK-p Sulinngiffeqarluni Angalanermut Aningaasaateqarfiata aamma ingerlateqqikkusuppaa, tassami ilaqutariittut angalanerpassuarnik aaqqissuussisarami. Mittarfeqarfiillu allagarsiussaat SIK-p Facebookianut ikkunneqareerpoq.
Tassa terminalertaap ammarneqarnera ilutigalugu isumannaallisaanikkut aaqqissuussinerit nutaat atuutilersussaagamik. Sumukassagaanniluunniit, aammalu akunniinnaraluaraanniluunniit, isumannaallisaavikkooqqaartariaqartarnissaq kinguleriiaarpassuulluni utaqqisariaqalernermik kinguneqarsinnaavoq. Taamaattumillu mittarfimmut takkutiaarnissaq pisariaqassaaq pisariitsumik utaqqinanngitsumillu isumannaallisaavikkoornissaq qulakkeerniassagaanni.
Nuummi akunnittut taamaalillutik terminalikkooqqaassapput, isumannaallisaavillu aqqusaaqqaariarlugu aallariartortunut inersuarmut ammukaqqissallutik timmisartumut ilaaffissarnut utaqqiartorlutik.
Mittarfeqarfiit nalunaarputtaaq 28. novembarip tungaanut taamatut isumannaallisaavikkoortarneq Nuummi aamma Kangerlussuarmi atuutissasoq, tassa marloriarluni isumannaallisaavikkoortoqartassalluni. Ulloq taanna Nuummit nunanut tamalaanut timmisartuussinerit ammarneqartussaapput.
”Marloriaammik isumannaallisaavikkoortitsisarnissaq tamanna pisariaqarpoq, tassami isumannaallisaanermi atortut nutaat aammalu isumannaallisaanermi suleriaasissat nutaat sungiusarnissaannut periarfissaqarniassagatta,” Mittarfeqarfinnit taama nassuiaasoqarpoq.
Allagarsiussaq “Nuummi mittarfimmi isumannaallisaanermi nakkutiginninneq pillugu ilisimasassat tallimat” asseq una toorlugu aaneqarsinnaavoq.
► Paasissutissat sukumiinerusut aamma uani atuarneqarsinnaapput: https://airports.gl/kl-gl/sikkerhedskontrol/