Sulinermik Inuussutissarsiuteqartut Kattuffiat (SIK) ileqquusumik ataatsimeersuarniarpoq ulluni 29.- 31. oktobari 2025 Hotel Arctic-imi, Ilulissani. Taamaalilluni sulisartut kattuffiat ukiuni atuuffimmini 69-ini 24-ssaanik ataatsimeersuassaaq (Grønlands Arbejder Sammenslutning, GAS, kingorna SIK-nngortoq, juulimi 1956-imi pilersinneqarami).
Tamanna ullualunnik sioqqullugu kattuffimmi peqatigiiffiit 19-iusut aallartitaat, siulersuisuunerit kattuffiullu allattoqarfiani sulisut Ilulissaneeriissapput.
Tassami ataatsimeersuarnissaq sioqqullugu pikkorissarnerit, isumasioqatigiinnerit paasissutissiinerillu ingerlanneqartussaapput, ilaatigut peqatigiiffiit kattuffiullu allattoqarfiata akornanni akisussaaffiit agguataarneqarnerat pillugu, aammalu isumaqatigiinniarnerit qaammatini tulliuttuni ingerlanneqartussat pillugit – taamatuttaarlu kattuffiup malittarisassaani iluarsiissutissat ataatsimeersuarnermi aalajangiiffigineqartussat nassuiaatigineqartussaallutik.
Ataatsimeersuarnerup ullua siulleq, pingasunngorneq 29. oktobari, pisarnertut nal. 8.00 hotelip saniani erfalasumik amusinermik erinarsoqatigiinnermillu aallarnerneqassaaq. Taava ingerlaaqatigiinneqassaaq kulturip illorsuata Sermermiut sanianit Pisiffik saneqqullugu Zionip Oqaluffianut, tassani naalagiartoqassalluni.
Nal. 10.30 ataatsimeersuarneq ammarneqassaaq siulittaasup Jess G. Berthelsenip tikilluaqqusineratigut. Ammaanersiornermilu tikeraat uku oqaaseqassapput: Suliffeqarnermut naalakkersuisoq Bentiaraq Ottosen, aningaasaqarnermut naalakkersuisoq Múte B. Egede, borgmester Lars Erik Gabrielsen, Baskerit nunaanni kattuffimmit tikeraaq Koldo Saenz kiisalu nunani avannarlerni sulisartut kattuffiisa suleqatigiiffianni allattuuneq Magnus Gissler.
Ataatsimeersuarnissami ullormut oqaluuserisassat ilagaat siulersuisuunerit nalunaarutaat tamatumalu oqaluuserineqarnissaa, soorunamilu kattuffiup aningaasaqarnera. Taava aamma malittarisassat malillugit siulittaasussamik, siulittaasup tullissaanik siulersuisuunernilu ilaasortassanik qinersineq oqaluuserisassanut ilaapput.
Asseq: 2021-mi SIK-p ataatsimeersuarneranit