SIK-p siulittaasua Jess G. Berthelsen Danmarkimi sulisartut kattuffiisa kattuffiata FH-p siulittaasuanit Morten Skov Christiansenimit pulaarneqaqqammerpoq. Kattuffissuaq tassa taanna siornatigut LO-mik taaneqartartoq.
Siulittaasut taakku ataatsimiinnerminni ilaatigut FH-p SIK-llu suleqatigiissutigisinnaasaannik eqqartuipput. Soorunalumi aamma maanna Kalaallit Nunaata, Danmarkip aamma USA-p akornanni pissusiulersimasut eqqartorneqanngitsuunngillat.
Tamatuma saniatigut Morten Skov Christiansen, 2023-mi FH-mut siulittaasunngortoq, nunatsinni suliffeqarnermut tunngasunik ilisimatinneqarpoq, taamatullu aamma inuussutissarsiornermi ineriartortitsinissamut periarfissat oqaloqatigiissutigineqarlutik.
Kingumut qiviaraanni SIK LO-lu ukiut ingerlaneranni imminnut qanittumik attaveqaqatigiittarsimapput. Taamalu SIK ukiut 70-inngulersut matuma siornatigut Grønlands Arbejder Sammenslutning-imik (GAS) taallugu pilersinneqarmat Danmarkimi sulisartut kattuffissuat malunnaatilimmik siunnersortaasimavoq.