Nunarsuarmioqatigiit sulisartunut ullorititaat atugarisamikkut pisinnaatitaaffeqarnerat ersarissaqqittuassallugu ulloq Tussiarfissuaq nalaaraluarlugu nalliussilluarparput. Katersortarfimmi inussillualaavippugut.
Ilulissani sulisartut peqatigiiffianni siulittaasoq Else Jonna Lange taama unnersiorluni www.sik.gl-imut allappoq.
Oqalugiarnerit, kajumissaasiinerit meeqqanullu pinnatassanik agguaanerit ingerlanneqarput, kiisalu borgmester Lars Erik Gabrielsen oqalugiarpoq.
Ukiorpassuarni aalajaallutik ilaasortavut Benedikte Henningsen, Louise Fly, Lars Peter Frederiksen aamma Saqqameersoq Ernst Jensen kajumissaammik tunineqarput.
Ukiuni arlalinni sulisartoq ilaasortarput sulisartunut kajumissaammik qaqutigoortumik Ôdâq Olsenip Aningaasaateqarfianit tunineqarpoq. Kajumissaatisisuuvoq Jens Jensen, ukiuni 42-ni Royal Greenlandimi sulisartoq, 1984-miilli sulisartut peqatigiiffianni ilaasortaasoq.
Suliffeqarfiit isernermi normunut makitassanut tunissuteqarput: Halibut Greenland, Royal Greenland, Pisiffik aamma Brugseni – taakkulu Else Jonna Langep qutsavigingaarpai.
