Akileraarut 1 procentimik qaffanneqassappat aningaasat SIK-p atorusuppa ilaatigut napparsimasut pitsaanerusumik isumagineqarnissaannut.
Ulluni makkunani eqqartorneqartut ilagivaat napparsimasoq Danmarkimut peqqissariartussaatillugu Kalaallit Peqqissartut Danmarkimi Illuanni akiliunneqarlutik inissinneqartarnerannut atatillugu, ilaqutaasup akiliunneqarluni Kalaallit Peqqissartut illuanni najugaqaannarsinnaanissaa.
Siullermik SIK-p oqaatigerusuppaa maannakkut SIK-p Isumaginninnermi Aningaasaateqarfiata ulluinnarni Kalaallit Peqqissartut Illuat suleqatigilluarmagu, tassami allannguutituaq uaniippoq, maannakkut ilaqutaasoq Kalaallit Peqqissartut Illuanni najugaqassappat Namminersorlutik Oqartussaniik akiliunneqartalermat – tamannalu pitsanngoriaataavoq. Siusinnerusukkummi namminneq akilertarmassuk. Kallaallillu Peqqissartut Illuat taannaavoq napparsimasunut inigitissallugu naatsorsuussaq, allanullu tamanut atorneqalissappat ernummatigaarput SIK-mi ilaasortagut peqqissariarniartut sivisunerusumik utaqqisariaqartalernissaat.
Taamaattumik akileraarut qaffanneqassappat qaffaat SIK-p makkununnga atorusunneruaa:
- Ullumikkorninnganik napparsimasut pitsaanerusumik isumagineqarnissaannut.
- Ilaasortatta inissianut annikinnerusumik akiliuteqartalernissaannut.
- Ilaasortatta isumaginninnikkut pitsaanersumik kiffartuunneqalernissaannut.
- Pisortani sulisut ullumikkumiik annertunerusumik aningaasarsiaqartinneqartalernissaat.
- Ilaasortagut angalaniartillutik annikinnerusumik akiliuteqartinneqartalernissaat.
- Kiassarnermut annikinnerusumik akiliuteqartinneqarlernissaat.
- Illoqarfinni mikinerusuni pisiniarfinni nioqqutissat akikinnerulernissaat.
SIK nammineq akisussaaffimmik tigusilluni suliffeqarfiit tamangajalluinnaasa isumaqatigiisuteqarfigereerpai Inunnik Isumaginninnermut Aningaasaateqarfimmik pilersitsilluni (Socialfondi).
Tassanilu ilaasortagut periarfissaqareerput inunnik isumaginnermi aningasaateqarfitsinninngaanniik aapparisaasoq – soorlu kræftimik eqqorneqarsimappat sutigut tamatigut ikiorserneqassallutik, soorlu qanigisaasoq angalanermut akiliunneqassaaq, ineqarneranut akiliunneqassaaq, Danmarkimi bussinut / qimuttuitsunut akiliunneqassaaq, aningaasarsiani annaasimappagit ukiup affaa tikillugu akilerneqassaaq. Aamma ilaasortarput toqukkut qimagussimappat timaata assartorneqarnera Isumaginninnermut Aningaasaateqarfimmiit akilerneqassaaq. Tassa ilaasortat 8.000-it sinnillit eqqartorpagut, taakkulu ilaqutaat ilanngukkutsigit innuttaasut sulisinnaasut 33%-ii pineqarput.
Tamaammat maannakkut SIK-mut ilaasortanngornermi aammalu SIK-p isumaqatigiissutaanik atuilernermi napparsimasoqartillugu ikiorsiinissammut kusanartumik periarfissaqareermat aningaasat 1 procentimik qaffassapata allamut atorusunneruagut.
Jess G. Berthelsen
Kattuffiup siulittaasua