Sulisut kattuffiinit Naalakkersuisunut allakkat: Nunatsinni akit qaffakkiartornerisa kingunerisaanik inuuniarnermut kingunerluutaat inuillu naligiinngitsumik atugassaqalernerannut tunngatillugu ernumassuteqarnermi allakkiaq – sulisartut kattuffiinit ataatsimoorussamik oqaaseqaat.
AK, SIK, IMAK, PPK, NPK aamma ASG- p matumuuna nassiuppaat akit qaffakkiartornerisa kingunerisaanik Nunatsinni inuuniarnermut inuillu naligiinngippallaamik atugassaqalernerannut kingunerluutit imaannaanngitsut pillugit ernumassuteqarnerminnut tunngatillugu apuukkumasaat.
Kattuffiit taakkuulluta sulisut amerlasuut assigiinngitsunik atorfillit, isertitatigut immikkoortunilu assigiinngitsuneersunik tunuliaqutaqartugut ataatsimoorluta ernumassutigaarput akit qaffakkiartornerisa isertitakitsut akunnattumillu isertitallit kiisalu aningaasaqarnermikkut periarfissakitsunik eqquinerlunnera.
Akit allanngoriartornerat aningaasallu pisissutaasinnaassusiat
Ukiuni kingullerni atuisunut akit allanngoriartornerat – tassunga ilaallutik ullluinnarni pisariaqartitat; soorlu nerisassat, ineqarnermut nukissiuutinullu aningaasartuutit qaffariangaatsiarnerat – inuit aningaasaqarnerannut annertuumik malunniuteqarsimavoq.
Annermik sulisartut aaliangersimasunik annikitsunik akunnattunillu isertitallit malugisimavaat aningaasarsiamik akinut malinnaasinnaannginnerat. Tamassumalu kingunerivaa aningaasat pisissutaasinnaassusiata annikillinera ulluinnarnilu aningaasaqarniarnerup ajorseriaateqarnera, taamaanneranilu sulisoqarneq inuiaqatigiillu eqqarsaatigalugit ernumanartoqartilersillugu.
Inuuniarnermi atukkatigut ilungersunartorsiorneq
Sulisut kattuffiisa annermik ernumassutigivaat akit qaffannerini aningaasartuutit annikillisinneqarsinnaanngitsut akilinngiinnarneqarsinnaanngitsullu, soorlu ineqarnermut akiliutit, kiassarneq kiisalu ulluinnarni inuuniarnermut atugassanut aningaasartuutit eqqorneqarnerat. Tamanna inuiaqatigiinni eqquinera annertuvoq, annermilli isertitakitsunut, akunnattumik isertitalinnut, soraarnerussutisialinnut, kisimiillutik pilersuisunut allallu killilimmik isertitalinnut eqquinera annertulluni.
Taamaattoqarnera inunnut amerlasuunut aningaasaqarnikkut toqqissisimannginnermik, katersisinnaannginnermik aammalu aningaasartuutinik pilersaarutaanngitsunik takkuttoqariataarnissaanut sillimasinnaannginnermik kinguneqartarpoq. Siunissaq ungasinnerusoq eqqarsaatigalugu tamassuma kingunerisinnaavaa, ilorrisimaarluni inuunissamut, sulisoqarniarnermut inuiaqatigiillu ataqatigiissumik ingerlanissaannut pitsaanngitsumik kinguneqarsinnaalluni.
Akit pilersarnerannut niuernermilu iluanaarutip misissornissaannik pisariaqartitsineq
Akit nalinginnaasumik qaffakkiartortarnerisa saniatigut kattuffiit pisariaqartutut isigivaat akit katitigaanerat, niuertut iluanaarusiisarnerat ineriartornerallu pillugit Naalakkersuisut misissuinissaat.
Akinut qaffaatit nioqqutissat avataaniik eqqunneqartarnerannik, angallassinermut akit, nukissiuutinut aammalu ingerlatsinermi akit qaffannerannut tunngaannarnersut imaluunniit ilaatigut unammillertikinnerup kingunerisaanik akit qaffasippallaarnerannik kinguneqartarnersut qulaarneqartariaqarpoq. Niuernerup iluani tatiginartumik ingerlasoqassappat ersarissumik paasissutissiisarnissaq pisariaqarpoq taamaalilluni akit allanngoriartornerisa kingunerisaanik inuiaqatigiit akornanni naligiinngippallaamik inissisimasoqalernissaanut qulakkeerinnissinnaalluni.
Nunanit allanit ilisimasat Nunatsinnilu iliuuseqarnissamik pisariaqartitsineq
Kattuffiit tikkuarusuppaat akit qaffakkiartupiloorneranni Danmarkimi qullersat tunngaanniit inunnut pissakinnernut aaliangersimasunik iliuuseqarsimanerat. Taamaaliornermut tunngaviulluni inunnut kingunerluutaasinnaasut eqquinerluutaasinnaasullu pinaveersaartinniarlugit.
Siunertaq tassaasimalluni aningaasat naleerukkiartornerisa kingunerisa inuiaqatigiinnut sunniuteqarnerlunnerisa annikillisarnissaat aammalu artukkiissutit ataasiakkaanut imaluunniit immikkut ittunut tutsinneqannginnissaat.
Isumaqarpugut Kalaallit Nunaanni assingusunik suliniuteqarnissamut tunngavissaqartoq, inuiaqatigiinni atugassarititaasunut naleqqussarlugit. Suliniutit immikkut ittut
ingerlanneqanngippata, akit ineriartornerat maanna atuuttoq inuuniarnermi atugassarititanut kiisalu inuiaqatigiinni naligiissumik atugaqarnissamut pffissaq ungasinnerusoq eqqarsaatigalugu pitsaanngitsumik kinguneqarsinnaanera aarlerinaateqarmat.
Sulisartut kattuffiiniit kajumissaarut
Tamakku tunngavigalugit kattuffiit AK, SIK, IMAK, PPK, NPK aamma ASG Naalakkersuisunut ima kajumissaaruteqarput:
akit aamma aningaasarsiornermi isertitakitsutut akunnattumillu isertitalittut inissisimasut akornanni artukkiissutit annertusiartornerat pingaartillugu isiginiassagaat,
artukkerneqarnerpaat immikkut ittumik tapersiiffigineqarnissaat eqqarsaatigissagaat, aammalu niuernermi iluanaarutit aammalu niuernermi atugassarititaasut pillugit misissueqqissaarnerit aqqutigalugit akit qanoq aalajangersarneqartarnerat pillugu ersarinnerusumik paasissutissiisoqarnissaa qulakkiissagaat.
Ernumassuteqarnermi allakkiaq una nassiunneqarpoq neriuutigalugu oqaloqatigiinnerit iliuuseqarnerillu piumaartut. Kattuffiit Nunatsinni aningaasatigut toqqissisimanermik, inuiaqatigiinni naligiissumik aammalu inuuniarnermi atugassarititaasut naapertuuttumik ingerlanneqarnissaannut iluaqutaasinnaasunik aaqqiissutissanik pitsaasunik iliuuseqarnissamut peqataajumallutik piareersimapput.
Atsiortut kattuffiit arfinillit siulittaasui:
Dina Olsen, AK
Dorthe Juul Munch, ASG
Navarana Johansen, PPK
Jess G. Berthelsen, SIK
Elna Heilmann, IMAK
Arnaq Brønlund, NPK