Nuummi nikittut: NSIP-p allaffianut matuersaat Sofie Svendsenip siulittaasutut paarlatsiminut Peter B. Mølgaardimut tunniuppaa.
Martin Egede, Narsaq
Dorthinnguaq Brønlund, Qaqortoq
Jens Nuka Poulsen, Tasiilaq
Pualuna Kivioq, Qaanaaq
Soorlu ilaasa paasereersimassagaat ukialerneranit maanna novembarimut sulisartut peqatigiiffisa siulersuisuini allanngortoqaaluppoq. Siulittaasut nutaat tallimat qinigaapput. Uanilu taakku oqaluttuaritsiassavavut kingullermit aallartillugit.
Oktobarip naanerani SIK ataatsimeersuarmat Nuummi peqatigiiffimmi siulittaasoq Sofie Svendsen kattuffiup siulittaasuata tulliatut qinigaavoq. Taamalu peqatigiiffimmi siulersuisut inissitsiteqqinneranni maannamut siulittaasup tullerisaa Peter B. Mølgaard peqatigiiffiit SIK-mut atasut annersaanni tassani siulittaasunngorpoq.
Narsami sulisartut peqatigiiffiat aamma novembarimi siulittaasortaarpoq. Tamanna pivoq immikkut ittumik ataatsimeersuarnermi, tassani Martin Egede siulittaasutut qinigaalluni, taarserlugu Ane-Marie B. Kaspersen, taanna siulittaasup tullinngortoq.
Oktobarimi aamma Qaqortumi immikkut ittumik ataatsimeersuartoqarpoq. Tassani Dorthinnguaq Brønlund siulittaasunngorpoq Gertrud Egede Jensenip tunuarnerata kingornatigut.
Septembarimi Tasiilami Jens Nuka Poulsen siulittaasunngorpoq. Tamanna tikillugu Justine Kalia siulittaasuugaluarpoq.
Kiisalu aggustimi aamma Qaanaami – SIK-mi peqatigiiffiit avannarlerpaartaanni – immikkut ittumik ataatsimeersuartoqarpoq. Tassani Pualuna Kivioq siulittaasunngorpoq Inge Alataq tunuartoq taarserlugu.
► Nunami tamarmi peqatigiiffiit siulersuisuisa allattorsimaffiat iluarsisaq una toorlugu pisinnaavat