Atuagaaraq 18-inik quppernilik “Ataatsimoorutta nukittunerussaagut” qupperarneqarsinnaavoq assiliaq una toorlugu.
Nuannaarutigaarput atuagaaraq nutaaq kattuffik ingerlataalu pillugit paasissutissanik imaqartoq saqqummersissinnaagatsigu maannalu peqatigiiffinnut nassiussuullugu. Peqatigiiffinnut maanna allakkerivikkut nassiussuunneqarpoq.
Atuagaaqqap ateraa ”Ataatsimoorutta nukittunerussaagut”, tassa oqaasinnaaq kattuffimmi assigiinngitsorpassuarnut tunngatillugu atorneqartoq. Atuagaaraq sulisartut peqatiiiffii kattuffiallu pillugit paasissutissiisarnerni ilaasortassarsiornermilu atorneqarsinnaasuliaavoq.
Imarisai tassaapput SIK pillugu paaserusunneqarsinnaasut tamalaat. Kattuffik kikkut pillugit atava? Qanoq aaqqissuussaava? Ilaasortaminut sutigut ikiuussinnaava?
Ilaatigut apeqqutit taakku akineqarput, taamatullu aamma ingerlatat pingaarnerit tamakkulu ilaasortanut qanoq iluaqutissaaneri oqaluttuarineqarput: Sulisitsisunik isumaqatiginninniar-tarnerit sulinermik inuussutissarsiuteqartunut qanoq pingaaruteqarnersut, aammalu ani-ngaasaateqarfiit angisuut SIK-p ingerlatai – soorlu Isumaginninnermut Aningaasaateqarfiit aamma Sulinngiffeqarluni Angalanermut Aningaasaateqarfik – ilaasortanut qanoq neqerooruteqarnersut.
Atuagaaraq 18-inik quppernilik aammattaaq paasissutissanut erseqqinnerusunut atortussanullu ujarliutitut atorneqarsinnaavoq, tassa nittartakkamut www.sik.gl-imut arlalitsigut innersuussigami, nittartagaq taanna kattuffiup paasissutissiisarfigimmagu tamanut ammasoq. Atuagaaraq aamma nittartakkamit qupperarneqarsinnaasuliaavoq.
Taamaalilluni atuagaaraq nutaaq SIK-p paasissutissiaanut pioreersunut eqikkaasutut atorneqarsinnaavoq.
Tassami aamma naqitaaraqarpoq marlunnik 2020-mili nittartakkamit anillatsinneqarsinnaanngorlugit suliarineqarsimasunik – nammineq printeri atorlugu naqiterneqarsinnaasunik, pappiala A4 ataaseq mumigiissillugu, taannalu pingasunngorlugu pertiterlugu.
Naqitaaqqat taakku tassaapput ”SIK-mut ilaasortaanerup iluaqutissartai”, taanna kattuffiup ilaasortaminut sullississutai pillugit naatsunnguamik paasissutissiiffiusoq, aamma ”Peruluutaasumik napparsimalernermi ingiaqatigineqarneq”, isumaginninnermut aningaasaateqarfiit neqeroorutaat assigiinngitsut pillugit paasissutissiiffiusoq. Naqitaaqqat taakku imarisamikkut maanna iluarsaatilaarneqarput atuagaaqqamut nutaamut tapertatut atorneqarsinnaajuarniassammata.
SIK-p allattoqarfiata peqatigiiffinnut allakkamini neriuutiginerarpaa atuagaaraq ”Ataatsimoorutta nukittunerussaagut” atorluarneqarumaartoq. Peqatigiiffiit atuagaaqqanik amerlanerusunik pisariaqartitsilissagunik kattuffiup allattoqarfianut saaffiginnissinnaapput.
► Aamma takukkit: Takutitassiat atuagassiallu