Inuit 177-it Danmarkimut angalanissamut makitaasimasut maanna SIK-p Sulinngiffeqarluni Angalanermut Aningaasaateqarfianit neqeroorfigineqarput tamatumunnga taarsiullugu Kalaallit Nunaanni angalanissaannut.
Periarfissinneqarputtaaq ullut arfineq-marluk tikillugit hotelimiissinnaanissaminnut, apeqqutaalluni nunatsinni angalanissaq pineqartoq Københavnimut bilitsimit nalinginnaasumit qanoq akisunerutigissanersoq.
Tamatumani ilaatigut pineqarput ilaqutariit 2021-mi angalanissaminnut makitaasimasut, ilaatigullu pineqarlutik allat 2020-mi angalanissaraluaminnik atuinngitsoorsimasut.
Tassa nunani tamalaani coronap tunillaassornerata kingunerisaanik angalaniarnermi pissutsit atuutilersut SIK-p Sulinngiffeqarluni Angalanermut Aningaasaateqarfia pilersaarutiminik iluarsiissuteqartariaqalerseqqippaat.
Corona inunnut angalaniaraluartunut toqqissisimajunnaarsitsisimavoq. Taakkorpiaallu tassa SIK-p feriefondianit neqeroorfigineqarput nunatsinni ornigassat arlaannut ukioq manna feeriarsinnaasut. Periarfissarlu taanna Danmarkimut angalanissamut makitaasimasunuinnaq atuuppoq.
Erseqqinnerusumik paasisaqarniaraanni saaffigineqarsinnaavoq
siunnersorti Inge Lennert, SIK