Piffissaq SIK-p Feriefondianut qinnuteqarfissaq tulliuttoq

Nittartakkakkut toqqaannartumik qinnuteqartoqarsinnaanngorpoq. SIK-p immikkoortortaqarfiinut sulisullu sinniisaannut ilisimatitsissut.

SIK-mit matumuuna ilisimatitsissutigineqassaaq 2022-mi sulinngiffeqarluni angalanissamik Feriefondimut qinnuteqarnermi immersugassat maanna nittartakkami www.sik.gl-imi pineqarsinnaalermata, taamalu piffissamut qinnuteqarfiusinnaasumut 1. maajimit 1. aggustimut piareerlutik. Qinnuteqarnermi periaatsit marluk tamatumuuna qinerneqarsinnaanerat nutaarsiassaavoq maluginiaqquneqartoq:

  1. Nittartakkakkut toqqaannartumik qinnuteqartoqarsinnaalerpoq. Tassa imaappoq nittartakkami quppernermi namminermi qinnuteqarfissiaq immersorneqarsinnaavoq. Immersuereernermilu tuugassaq ”Qinnuteqarit” tooraanni qinnuteqaatip SIK-p Sulinngiffeqarluni Angalanermut Aningaasaateqarfianit tiguneqarneranik uppernarsaammik skærmimi saqqummertoqassaaq.
  2. Piumagaannili periaasitoqaq atorlugu qinnuteqartoqarsinnaavoq, tassa immersugassamik pappialamut anillatsitsilluni, taannalu immersoriarlugu najukkami SIK-p immikkoortortaqarfianut tunniullugu imaluunniit e-mailikkut feriefondimut toqqaannartumik nassiullugu.

Taasariaqarpoq ilitsersuuteqarmat taamatut angalanissamik qinnuteqarnermi atugassarititaasut erseqqinnerusumik allaaserineqarfiannik. Ilitsersuutit taakku atuarneqarsinnaapput nittartakkami quppernermi ”Sulinngiffeqarluni Angalanermut Aningaasaateqarfik”-mi aamma qinnuteqarnermi immersugassap anillatsitassap quppernerata aappaani.

Tamatumani maluginiaqqunarpoq Danmarkiliarnissamik qinnuteqaatigaluni aamma Kalaallit Nunaata iluani angalanissamik qinnuteqartoqarsinnaajunnaarnera – arlaat ataaseq kisiat qinnuteqaatigisariaqarpoq (tamanna pisariillisaataassaaq qinnuteqaatit allaffissornikkut suliarineqarneranni, tassami qinnuteqaatit tuusintilikkaat tiguneqartarmata). Aamma aapparisap imaluunniit inooqatigisap ukiumi pineqartumi feriefrirejseqarnera atorlugu angalasussaagaanni ukiumi tassani angalanissamik qinnuteqartoqarsinnaanngilaq.

Nittartakkami qupperneq immersugassartalik uaniippoq: https://sik.gl/sik-pillugu/aningaasaateqarfiit/sulinngiffeqarluni-angalanermut-aningaasaateqarfik/