SIK-p allattoqarfia sulisartut peqatigiiffiinut, sulisut sinniisaannut il.il. allagaqarpoq feriefondip angalanernik aaqqissuussineri assigiinngitsut marluusut pillugit erseqqinnerusunik paasissutissiilluni – tassa ukioq allortarlugu akiliunneqarluni angalanernik aamma makitsinikkut angalanernik.
Ukioq allortarlugu akiliunneqarluni angalasinnaaneq SIK-mut tunngatillugu nutaajuvoq ukioq manna atuutilersoq. Makitsinikkut angalanerit ukiorpassuanngulersuni atuutereersimapput.
Aaqqissuussinerit taakku kikkunnut atuuppat, qanorlu ingerlanneqarpat? Apeqqut akineqarpoq assersuutissanik ilallugu.
Paasissutissat pisariaqartut tamarmik SIK-p nittartagaani www.sik.gl-imi atuarneqarsinnaareeraluarput. Taamaattorli SIK-p allattoqarfiani pisortap Bjarne Petersenip maluginiarsimavaa sulisartunut sinniisuusut akornanni paatsuungasoqangaatsiartoq. Taamaattumillu sapaatip-akunnerani qaangiuttumi nassiussaqarpoq allakkiamik paasissutissiissummik arlalinnik qupperneqartumik, peqatigiiffilerisut sulisullu sinniisaat ilaasortanit aperineqaraangamik nalorninatik akisarnissaannut ikiorumallugit.
Assersuutigalugu ukioq allortarlugu akiliunneqarlutik angalasinnaalereersunik qinnuteqartoqarsimavoq makitsinikkut angalanerit makitsissutigineqarnerannik peqataarusuttunik. Taamaattumillu SIK-p allattoqarfia allakkiami imaattumik erseqqissaateqarpoq:
Soorlu pisortani allaffimmiutut, meeqqerisutut imaluunniit peqqinnissamut ikiortitut (sulisut immikkoortut sisamaasut ukioq allortarlugu akiliunneqarlutik angalasinnaatitaasut ilaattut) atorfeqaraanni makitsinikkut angalanissamik qinnuteqartoqarsinnaanngilaq. Tassami sulisut taakku ukioq allortarlugu angalanissamut akiliunneqarsinnaareerput.
Allatut oqaatigalugu: Ukioq allortarlugu akiliunneqarsinnaajutigaluni makitsinikkut angalanermik pissarsisoqarsinnaanngilaq – taakkua arlaannaat pineqarsinnaavoq.
