Ilulissani maajip aallaqqaataani oqalugiaat

Ilulissani maajip aallaqqaataasiornermit assilissat siulittaasullu Else Jonna Villadsenip oqalugiaataa.

Maajip aallaqqaataasiorneq Katersortarfimmi pivoq.

Ukiorpassuarni ilaasortaasimasut kajumissaatisisut.

Ilulissani SIP-mi siulittaasoq Else Jonna Villadsen ima oqalugiarpoq:

Ataqqinartut sulisartut, ataqqinaammik ilaasortagut maanilu najuuttusi tamassi.

Kingumut maani katersuuppugut nunarsuarmioqatigiit sulisartunut ullorititaat nalliussillugu malunnartinniarlugu.

Qujanartumik katersuussinnaaqqilernikuuvugut killeqaraluartumik tassami COVID-19 pillugu ukioq kingulleq ataatsimoorfiginngikkaluarlugu attaveqaatitigut paasissutissiisarnikkullu ataatsimoorfeqartuarpugut.

Qanittumi qinersineqarpoq kommunemut aamma inatsisartunut taakkununngalu isumalluarpugut qineqqusaarnerminni anguniagarpassuisa ilaat aamma sulisartut atugarissaarnerulernissaannik anguniagaqarmata.

Taamaakkaluartoq suli pisinnaatitaaffigut ersarinnerulersikkusullugit sorsuuteqarnerput nangissuarput, piffissami matumani nalaattaannarparput ullormiik ullormut soraarsitsisarnerit suli atuummata isumaqatigiissutit avaqqullugit iliuuseqartarnerit akuerinngilluinnaratsigit.

Qujanartumik ullumikkut nunatsinni illoqarfinni suliffissaaleqiffiunnginnerpaat ilaanniippugut taamaakkaluartoq sakkortuumik sulisartut unammilligassaqarpugut tassami misigineqartaannarpoq sulisussaarunnermi sulisut qasuersaarneqarpiaratik suliinnartinneqartarneri suli atugaasarmata pingaartumik inuleriffiusuni, sulisartoq aalajaatsoq sulisorineqaannassappat aamma qasuersaarsinnaatitaaffii sulisitsisunik ataqqineqartariaqarput pisinnaatitaaffiilu ersarinnerutillugit.

Avannaata kommuneanut tunngatillugu isumaga malillugu akileraarutinut akiliutigisartakkagut eqqarsaatigalugit kukkunerit sapinngisamik sakkortunerusumillu pinaveersaartinneqartariaqarput atorfinitsitsisarnermi soraarsitsisarnermilu aningaasat maanngaannaq aniatsinneqassanngippata sapinngisamik silatusaarluni aqunneqartariaqarsorigakkit, ukiut nalorninartorsiorfiusut COVID-19 suli nunarsuarmi atugaasoq eqqarsaatigalugu isumannaatsuunissaq sillimanissarlu pisariaqarluinnarmat.

Illoqarfik ineriartortoq suliffeqarfippassuarnillu sanaartornikkut ingerlatsiviusoq, sulisartunik pisariaqartitsilluinnartoq nunagaarput, takusinnaasarpullu malillugu annertuumik avataaniik suliartortorpassuaqarpoq, nunaqavissulli eqqarsaatigaluta annerusumik suli piginnaanngorsaaneq kiisalu pikkorissarnerit pisariaqartippagut namminersortullumi annertuumik unammilligassaqarmata nalunngiivipparput tamatta immitsinnut pisariaqartilluinnarluta.

Meerartagut siunissatsitut taasartakkagut perorluartissagutsigit minnerunngitsumik peqqissuunissaq eqqartortuagarput eqqarsaatigalugu qaammarsaaneq annertuumik pisariaqartipparput suliffimmilu atugarisatigut akissarsiatigullu ullumikkumut naleqquttumik atugassaqartitaanissaq pisariaqartillugu, taakkununngalu tunngatillugu oqartussaasut qinikkagut piumaffigissuakka sulisartunut tunngatillugu eqqumaariffeqaqqullugit siusinaartumik soraarnerussutisiaqalertussat amerlanerulissanngippata, takusaannarparpummi sulerulussimanerup kingunerisaanik timikkut anniaatit sulisartut eqqissillutik utoqqalinissaraluinut nanertuutaasartut tamakkulu annikinnerulersinneqarnissaat pingaartipparput.

Naggataatigut ullorsiorluarnissamik tamassi kissaallusi sulisartut ulluanni pilluaritsi.