SIK-p siulittaasuata oqaaseqaataa: Inuiaqatigiit ersarissumik paasitinneqartariaqalerput maani nunami susoqarnersoq.
Inuiaqatigiinnut tamanut toqqissisimanarunnaarpoq ameerikkarmiut maanga nunamut uteqattaartumik tikeqattaarnerat. Nunarsuup ilaani maannakkut sorsuttoqarpoq. Ruslandip Ukrainimut sorsunnera maannakkut USA-p annertuumik akuleruffigiligaa, Israelimi sorsunneq USA-p akuleruffigaa, Yemenimi huthienut saassussivoq…
Massakkut paasitsinneqarpugut ameerikkarmiut sikkerhedsrådgiveriat aammalu energi-ministeriat nunatsinnut “qimussersunik isiginnaarialersut”. Arraa, nunarsuarmi sorpassuarnik “ikuallattoqartoq” inuit taamak pingaaruteqartigisumik inissisimasut qanoq ilillutik piffissaqarsinnaappat qimussersunik isiginnaariassallutik.
Taamaattumik inuiaqatigiit paasitinneqartariaqalerput. Maani nunami susoqartoruna?
Aamma ersarissumik paasitsinneqartariaqarpugut Jørgen Boassen aammalu Kuno Fencker kia pisinnaatissimanerai sinnerlutalusooq ameerikkarmiunik oqaloqateqartarnissaannik?
Aamma paaserusunnarsivoq qanoq-una ameerikkarmiut oqaluttuuteqattaaraat ?
Aaammalu isumaqarpunga misissorneqartariaqalersoq taamatut iliornerat nunatsinnut inuinullu killuussinertut nalilerneqarsinnaanersoq?
Tassami inuiaqatigiinnut toqqissimanarunnaarpoq inuit taakkua marluk socialmediakkut saqqummeqattaarnerat ameerikkarmiunit ikiorneqarutta qanoq pilluartigilissanersugut. Taamatut oqariartoqattaarnermikkut suunuku paasissutissat pigigaat? Aammalu kiaana sunniiniutinik suliaqartussatut sulisikkai, sooq-una taamatut sulisut ?
Pisut aallartimmatali oqariartorpunga Danmarkilu suleqatigiinnerput nukittorsarniartigu ataqqeqatigiilluta, aammalu EU, nunallu avannarliit ilanngutsinneqarniarlik. Kisianni oqariartoqattaaginnavippugut: Danskiunianngilagut ameerikkarmiuunianngilagut, kalaaliuniarpugut. Suniarnerlutali oqariartorata.
Jess G. Berthelsen
SIK-p siulittaasua