Upperaara inuk sulisussanngorlugu pinngortinneqartoq. Taamaammat inuk peqqissoq piaaraluni suliffissaaleqinavianngilaq. Pinngitsaaliinikkut sulisitsilersinnaaneq upperinngilara. Sulisitsisup aammalu sulisartup tamarmik iluaqutiginavianngilaat imminut tulluutinngitsumik suliffimmut pinngitsaalillugu sulisinneqalersinnaanera. Taamaattu-mik SIK-p isumaqatiginngilluinnarpaa suliffissaaleqisut atugaasa ajorninngortinneqarnissaat.
Naatsorsueqqissaartarfiup kisitsisaatai naapertorlugit suliffissaaleqineq ima inissisimavoq, tassa inuit qassiuneri 2023-imi ukiumut agguaqatigiissillugu, sulisinnaasut amerlassusaat tunngavigalugu procentinngorlugu, illoqarfinni ukunani:
Narsami 52-it, tassa 8,36%
Tasiilami inuit 52-it, tassa 6,38%.
Qaqortumi 78-it, tassa 5,21%
Nuummi 210-t, tassa 1,95%
Ilulissani 24-it, tassa 0,95%
Takuneqarsinnaavoq illoqarfinni anginerni sulisinnaavissortut tamarluinnarmik sulisut. Taakkunani illoqarfinni sulisussaaleqipput.
Kujataani aammalu Tasiilami suliffissaaleqisoqavissortoq naluneqanngilaq, tassami suliffissat naammanngimmata. Illoqarfinni taakkunani qanoq arpaqattaartigigaluarunik suliffissanik nassaarnavianngillat. Aap soorunami sulisussaaleqiffiusunut nuutsinniarsinnaavagut, kisianni nalunngilarput inissaqartinneqanngitsut.
Illuatungaatigut isumaqarpunga suliffissaaleqisumininnguanut siunnersuineq pitsaanerulersinneqartariaqartoq. Tassa suliffissaaleqisoq peqatigalugu ingerlariaqqissinnaanissaanut aammalu tulluartumik nassaarsinnaaneq aallunneqarnerusariaqarmat. Kiisalu aamma ilinniarsinnaanissaanut siunnersuineq pitsaanerulersinneqartariaqartoq isumaqarpunga.
Suliffissaaleqisut ajornerusumik pineqarnerisigut Nunatta aningaasqarnera aaqqinneqar-navianngilluaasarpoq. Maani nunami atugarissaarnerulernissaaq sulissutiginiarsiuk, aningaasarsiat qaffanniarsigit, inissianullu akiliutit appartinniarsigit, qineqqusaarassi sorpassuarnik neriorsorpatsigut, tamatta atugarissaarnerulernissatsinnik oqariartorlusi.
Ernumatigaara taamatut sukaterinerup kingunerisaanik kalaaleqatigut Danmarkimut nuuttut amerlareeqisut suli amerleriassasut, tamannalu Nunatta pisariaqartinngilluinnarpaa.
Aamma taamaattumik SIK-p isumaqatiginngilluinnarpaa suliffissaaleqisut atugaasa ajorseriartinneqarnissaat.
Jess G. Berthelsen
Kattuffiup siulittaasua