Polar Raajat A/S-imik isumaqatigiissutip atsiorneqarnerani: Sulisut sinniisuat Nuka Bjørn Heilmann, direktør Jan Weinrich aamma SIK-p siulittaasuata tullia Sofie Svendsen.
Ukiup matuma aallartinnerani isumaqatigiissutit tapiliussallu nutarterneri arlallit SIK-p nittartagaanut iliorarneqarput.
Tamatumani pineqarput Royal Greenlandimut isumaqatigiissutit piffissamut 2026-28-mut atuuttussat. Aamma pineqarput GE-mut isumaqatigiissutit aatsitassarsiornermi akissarsianut qasuerserfissaqarnissamullu aalajangersakkanut tunngasut.
Qaqutigoorluinnartoq aamma taasariaqarpoq, tassa Royal Greenlandimut isumaqatigiissutit 2026-28-moortut kiinamiutut tamatumuuma aamma pineqarsinnaammata – taamaattunik SIK-mi siornatigut takuneq ajoratta.
Polar Raajat-nut aamma Hotel Arctic-imut isumaqatigiissutit nutaat 1. apriili 2026-mi atuutilersussat marsip naalernerani nittartakkamut ilineqarumaarput.
Marluk nutaarluinnaat
Suliffeqarfiit SIK-mut isumaqatigiissutillit nittartakkami allattorsimaffianni siornatigut allassimanngitsut marluk maanna allassimalerput: ANUNI aamma Inuit Quality Clothes of Greeland.
Taakkuupput sinerissami atisaarniarfiit siullerpaamik SIK-p isumaqatigiissuteqarfigisai. ANUNI Hanne Kristiansenimit pigineqarpoq Aasianni Sisimiunilu pisiniarfiuteqartoq. Inuit Quality Clothes of Greenland Nuummi pisiniarfiuteqarpoq piginnittoralugit Hanne Kristiansen aamma Dorthea Rødgaard.
Piginnittuusut taakku nunatsinni nunaqavissuupput. Malugineqarsinnaavoq sulisuminnit SIK-p aningaasaateqarfii iluaqutigineqarnissaat pingaartittorujussuugaat. Tassami akissarsiat tapillu assigiinngitsut saniatigut sulisumik allanik ”ajunngitsorsiassaqarnissaat” pingaartippaat, taamaalillutik sulisut ulluinnarni aningaasaqarniarnermikkut allatigut oqilisaanneqarniassammata.
Isumaginninnermut Aningaasaateqarfik ilaatigut periarfissiivoq qanigisaq napparsimarulutsillugu ingiaqataanissamut. Qaammatit pingasut imaluunniit ukioq affaq akissarsianik annaasassanik matussusiisoqarsinnaavoq, apeqqutaalluni nappaat peruluutaasoq suna atugarineqarnersoq. Qanigisap toqusup ilerrata imaluunniit qummuattap angerlaannissaanut akiliussisoqarsinnaavoq. Aapparisamut illoqarfimmi allami erniartortumut ingiaqataanissamut akiliussisoqarsinnaavoq. Kiisalu isaruartaarnissamut akiliutitittoqarsinnaavoq – sulisumut namminermut imaluunniit qitornaanut 18-it inorlugit ukiulinnut.
Tassa iluaqutissarititat tamakku tamarmik SIK-p nittartagaata Isumaginninnermut Aningaasaateqarfimmut tunngasortaani atuarneqarsinnaapput, nutaartaqaleraangata iluarsineqartarlutik.
Aamma Feriefondi suliffeqarfiit taakkua marluk sulisuinut periarfissiivoq ukioq allortarlugu akiliunneqarlutik feeriarlutik angalanissaannut.
Suliffeqarfiit taakkua marluk piginnittuisa aamma pingaartittorujussuuaat pisiniarfimminni sulisut sinniisoqarnissaat, taakku aqqutigalugit isumaqatigiissutinik sulisut paasisaqarneruniassammata sulisartoqarnermilu pissutsinut allanut malinnaanerullutik.
SIK-p siulittaasua Jess G. Berthelsen aamma ANUNI-mik piginnittoq Hanne Kristiansen.
Inuit Quality Cloathes of Greenland-imik piginneqataasoq Dorthea Rødgaard. Asseq matuma talerpia’tungaani: Atisat Inuit meqqiat nunarsuarmi saqqumilaartinneqartarpoq, uani Gate of Peace-mi, Hiroshima-mi (Japanimi).
