Skip to content

Jess G. Berthelsenip SIK-mi siulittaasutut ukiunik 25-liinerani

Aningaasaqarnermut Aatsitassanullu Naalakkersuisup Anda Uldumip nalliuttorsiornermi Naalakkersuisut sinnerlugit oqalugiaataa.

Nunatsinni sulisartut kattuffiisa anginersaanni ukiuni 25-ini siulittaasuullutit nalliuttorsiorninni pilluarit. Kingumut qiviassagaanni oqartoqarsinnaavoq ukiunik 25-ersuarnik nalliuttorsiornerit qaqutigoorluinnartuusoq. Ukiut 25-t siulittaasuuffitit siulerisirnasavit pingasut siulittaasutut atuuffigisimasaannut nallersuukkutsigik, taava taakku pingasut tamarmik siulittaasutut atuuffigisimasaasa quleriaataat sinnerlugu atuussimavutit. Tamanna imaannaanngeqaaq. Nunatsinnilu pissutsit eqqarsaatigalugit inummik siulittaasutut ukiuni taama amerlatigisuni atuussimasumik
eqqaasassaqanngilanga. Inummi alla, illit siulittaasutut atuussimaninnit sivisunerusumik siulittaasuusimasoq eqqaasassatuara Kinamiippoq, tassalu formand Mao.

SIK-mik oqartoqarpat, taava eqqarsaatigineqartarpoq ateq Jess G. Berthelsen.
Ilinniarsimanngitsunut ilinniarsimasunullu siulittaasutut sulininni ilaasortavit soqutigisaat pimoorulluinnarlugit illersorniartuartarpatit, aammali illua’tungeriit naarnmagisimaarsinnaasaannik aaqqiissuteqarnissaq tamatigut soqutigisarlugu. Taassuma saniatigut pikkoriffigiuakkavit ilagaat isumaqatigiinniarnerni kanngittuuittoqartillugu, sulinerup ingerlaqqinnissaa pisinnaaqqullugu aaqqiissutissanik ujartuillaqqissuunerit. Aamma siunissami unammillerniagassanut aaqqiissutissat minnerunngitsumik
siunnersuuteqarfigisinnaasarpatit. Tamanna pitsaasumik ingerlattarsimagit Naalakkersuisut sinnerlugit uppernarsarusuppara. Qujanaq.

Inuiaqatigiinni uagutsitut ittuni illua’tungeriit ersarissunik isummersortartut, aammali naaperiaanissamut piumassusillit pinngitsoorneqarsinnaanngillat.
Suliassat tungaasigut taamatut pitsaasumik peqataanngikkutta inuiaqatigiit akuuffigisavut pitsaanerulersinnavianngilagut.

Ilaasortavit soqutigisaannavii soqutigisarinngilatit. Inuiaqatigiittulli aaqqissuussaanitsinni soqutiginnilluinnarlutit peqataajuartarputit, soorunami ilaasortavit soqutigisaat pingaartillugit, aammali inuiaqatigiit ataatsimut.

isigalugit isummersoriaaseqarlutit. Tassa isumaginninnermut tunngasuniit aalisarneq, oqaatsit ilinniartitaanerillu pillugit. Aamma susassaqarfik alla susassaqarfiilluunniit allat arlaqartut inuiaqatigiinni oqallinnermi akuuffigilluarsimasatit minissimassagukkit tamanna tupigissanngilara.

Allatut oqaatigalugu: SIK-p avammut kiinnertinnissaa pikkoriffigisimavat, ullutsinniluunniit mutiunerusumik taaguuseeriaaseq atussagutsigu: SIK ima naqissuserluinnarsimatigivat, allaat SIK inuiaqatigiiusugut uagut politikkitsinnik aalajangersaasoqarnerani avaqqunneqarsinnaajunnaarluinnarsimalluni.

Piffissami nuimasut inuinnaallu imminnut ungasippallaalersimanerannik oqaluffiusumi illit taamaattunut ilaanngilatit. Oqaaseqaraangavit arlaannaataluunniit oqaatsitit paasinngitsoorsinnaaneq ajorpai. Tamanna toqqissisimanartuuvoq. Pingaartumik isummat inuiaqatigiinni uagutsinni avissaartuussutaasut pillugit isummersussallutit sapiiseraangavit. Matumani ilaatigut eqqarsaatigaakka Narsap eqqaani Kuannersuarni uran pillugu isummatit. Tamanna pitsaasuuvoq. Inuiaqatigiimmi ineriartussappata nutaaliornermik eqqarsarnissaq – taakkuninngalu aalajangiusimanninnissaq pisariaqarput.

Uanga nammineq politikkimik soqutiginnikkiartulerninniilli kalaaUit inuiaqatigiit ineriartornerannut akuulluinnartunut ilaajuarsirnavutit. Ukiumi
Namminersornerulernerup atuutilerfiani inunngorsimasuullunga aqqanilinnik ukioqartungali siulittaasuulerputit. Sulilu nukissaqaqigavit ukiuni 25-ni tulliuttuni suleqqissinnaanerit naatsorsuutigaara. Taamaalioruillumi uanga panimma marluk nunatsinni politikkimut ilaalluinnartutut isigilerumaarpaatsit.

Isummatittaaq saqqummiunniartillugit imminut pilliutiginissarnik qunugisaqannginnerit naluneqanngilaq. Kiami eqqaamanngilaa, ataatsirnoortumik tapiissutinik Danmarkimit tunineqartuarnissarninngarnit “siparnimut aquittarusunneruninnik” oqarnikuunerit. Taanna eqqaallugu maanna oqalugiarninni uniffeeruteqqanera ajuusaarutigaara. Naammiuna taanna “siparni”?

Nalliuttorsiorninni aammaarlunga Naalakkersuisut sinnerlugit pilluaqquakkit.
Nikuilluta Jess G. Berthelsen nipitoorsuarmik huraarutiginiartigu. Hurra.

Aningaasaqarnermut Aatsitassanullu Naalakkersuisoq, Anda Uldum, Naalakkersuisut sinnerlugit.