Kanngusuppunga nunarput asangaagarput ataatsimoorfigisinnaannginnatsigu.
(SIK-p siulittaasuata oqaaseqaataa).
Kingumunaasit USA-p præsidentia oqariartorpoq nunarput tigorusullugu. Uagut nunatsinnut asannittut avataaninngaanniit tiguniarneqarnerput akuersaanngilluinnarparput.
Eqqaamasariaqarparput illersorneqarnissarput pillugu USA sakkutooqarnikkut maani nunami qanorluunniit iliorsinnaammat. Aamma inatsisit atuuttut naapertorlugit nunat allatulli qinnuteqarsinnaapput aatsitassarsiorniarlutik, niuerniarunilluunniit suugaluarnersunik. Uagut niuerutissaqarutta, tassami maannakkut niuerutigisinnaasavut maani nunamiittut tamaasa niuerutigaavut. USA tunisassaqassagutta aalisagaatitsinnik pisiniaruni takanna, kisianni maannakkut aalisakkat qaqittakkavut tamaasa tunisarpavut.
Amerikarmiorpassuit aamma qangali nunatsinnut takornariartarput, aamma tassuuna niueqatigereerpavut. Taava sukkununa qaavatigut niueqatiginiarlugit eqqarsartut? Sermersuaminersuarmik pisiniarunik takanna, ila ila.
Kalaaleqativut ataasiakkaat soorlulusooq sinnerluta aasit USA-mi tusagassiuutitigut apersorneqarlutik isumaqalersitsipput USA-mit tiguneqassagutta Kalaallit Nunaata “ajorinngik-kaa”. Allaat oqariartorlutik USA-mik suleqatigiinnissamut isumaqatigiissuteqartariaqartu-gut. Taakku kalaaleqatitta taamatut pissusilersornerat akuersaanngilluinnarparput. Ilumut kanngusuutigaara nunarput asangaagarput ataatsimoorfigisinnaannginnatsigu.
Nunarput tuniniagaanngilaq, aamma nunarput kalaallit pigaat. Nunat namminersortut tiguinnarneqarsinnaanngillat. Aamma nunat nunanik allanik tigusiinnarsinnaanngilllat.
Erseqqissaqqillarput, nunarput tuniniagaanngilaq!
Taamaammat maannakkut nalunaarutigissavarput naalakkersuisutta sulinerat 100 procentimik tapersersoratsigu. Tassaasoq: Nunarput kikkunnilluunniit avataaniit tiguneqassanngilaq. Manna nuna kalaallit nunarput Kalaallit Nunagaat tiguinnarneqarsinnaanngitsoq.
Jess G. Berthelsen
Kattuffiup siulittaasua