SIK-p siulittaasuanit oqaaseqaat:
Kommune Kujalleq nakkutigineqarpa ?
Nalunagu aningaasat tungaatigut Kujalleq ajornartorsiortoq, sooruna qangalili Naalakkersuisunit aningaasatigut aqutsisoqalinngitsoq? (Qineqqusaarnerup naligimmagu una ilanngullugu oqaatigissavara: Inatsisartunut ilaasortaasimasut aammalu Inatsisartunut ilaasortaareersimasut ilaasortanngoqqittullu assamminnik errortuiniarsarissanngillat, tassami Kommune Kujallermi aningaasanik aqutsisoqalernissaanik kissaateqarluni ataaserluunniit oqariartuuteqarnikuunngimmat).
Piffissami kingullermi ilaasortatsinnit saaffigineqartualerpugut sipaarniarneq peqqutigalugu Kommune Kujallermit soraarsitaasunit, imaluunniit sulinerat 40 tiiminiit 20 tiiminut appartinneqartut.
Arraa! Ullumikkut kikkut tamarmik nalunngilaat inuuniarneq maani nunami qanoq ilungersunartigisoq. Takorloorneqarsinnaanerpa 20 tiimiinnaq sapaatip-akunneranut sulinikkut aningaasarsiat inuussutigineqarsinnaanersut? Tassaqaluunniit inigisamut akilutigissallugit naammappat.
Taamaattumik Kommune Kujallermut tunngatillugu Naalakkersuinikkut sukkanerpaamik akuleruttoqartariaqarpoq. (Nalunngikkaluarpara maannakkut ajornakusoortoq Naalakkersuisut Naalakkersuisuugallarmata, taamaammat Naalakkersuisunngortitsisoqareerpat sukkanerpaamik Kommune Kujallermut qanoq iliuuseqapallattoqartariaqarpoq).
Aamma tupigusuutigaarput taamatut soaarsitsiortorniarlutik aalajangeramik kattuffiit attuumassuteqartut ilisimatinneqanngimmata. Tamanna pissusissamisuunngitsutut isigaarput.
Maannakkut Kommune Kujallermi atorfeqartut assut toqqissisimanngillat. Tupinnanngitsumik eqqarsartoqarpoq: Immaqa uanga soraarsitaasussani tullinnguutilerpunga.
Taamaammat tusarusunnarsivoq qassinuku aningaasatigut sipaarniarneq pillugu soraarsitaaniartut, aamma kikkut pineqarpat?
Jess G. Berthelsen
kattuffiup siulittaasua