Kommunip aatsitassarsiorniartunik atsioqatiginninnera Kujataanuinnaq iluaqutaanavianngilaq, nunarpulli tamaat isigalugu iluaqutaassaaq.
SIK-p assut nuannaarutigaa maannakkut Kommune Kujalleq aammalu Kujataani aatsitassarsiornermik ingerlaqataqarniartut, Greenland Minerals & Energy aammalu Tanbreez, sapinngisamik nunaqavissut pingaarnerpaatut sulisorineqarnissaat pillugu atsioqatigiissimammata.
SIK isumaqarpoq taamatut anguniagaqarneq aammalu atsioqatigiissimaneq inuiaqatigiinnut SIK-mullu assut toqqissiallannarlunilu qaamaniminermik isigisaqartitsilersoq.
Taamatut atsioqatigiinneq Kujataanut tamaallaat iluaqutaanavianngilaq, kisiannili nunarput tamaat isigalugu iluaqutaassaaq.Tassami maannakkut nunatsinni sumiiffiit ilaanni sulisussanik amigaateqaraluarluta sumiiffiit ilaanni suliffissaaleqineq suli annertoqaaq. Taamatullu siuniussaqarnikkut, tassa nunaqavissut salliutinneqarnerisigut, periarfissaqalissaagut suliffissaaleqiffiusuniit Kujataanut suliartortitsisinnaalluta.
Jess G. Berthelsen
Kattuffiup siulittaasua