Sulisartut kattuffiat SIK siorna corona nalorninartorsiortitsileruttormat Nuummi pisarnertut maajip aallaqqaataasiortitsinngitsoorpoq ingerlaaqatigiinnertalimmik katersortarfimmilu oqalugiarnertalimmik. Ukioq mannali periarfissarissaarnerussaaq.
Katersuunnernut killilersuutit qasukkarneqarsimammata SIK aamma kattuffiup immikkoortortaa NSIP tamatumuuna qaaqqusipput nal. 13.00 illoqarfiup qeqqani ingerlaaqatigiinnissamut katerittarfimmit Amisunit aallartittussamut. Tamatuma kingorna Katuap paarlersuani kaffillertoqassaaq oqalugiartoqassallunilu il.il. nal. 16.00-ip tungaanut.
Katuamili pisussaq tamanna suli killilersuiffiusussaavoq, tassa isersinnaatitaasut qatserisartoqarfimmit akuerineqarsimasut amerlanerpaaffissaasa affaannaat isersimaqqusaasussammata.
Taamaattorli SIK-p siulittaasuata, kattuffiup immikkoortortaqarfiata siulittaasuata politikkikkullu siulersortaasut oqalugiartussaanerisigut kiisalu aliikkusersuisoqarlunilu erinarsoqatigiittoqartussaaneratigut ullormi tassani pisussat coronap siornatigutungajak ingerlasussanngorput.
Sinerissami SIK-p immikkoortortaqarfiisa soorunami namminneq aalajangissavaat ulloq taanna suniarnerlutik, soorunami coronap nalaani inassutaasut illullu iluini katersuussinnaanernut killilersuutaasut ataqqillugit.
Paasissutissat erseqqinnerusut piumagaanni Estrella Mølgaard Thomsen, SIK, tlf. 32 21 33, saaffigineqarsinnaavoq.
► Una tooruk maajip aallaqqaataasiornissami pisussanik pilersaarut aajumallugu