Kingumut pisariaqarluinnaqqilerpoq Kalaallit Nunatsinnut asasatsinnut ataatsimoorluta naalakkersuinikkut suliniutigineqartut tunuliaqusersussallugit.
Siornaakkunnili pisut aallartimmata SIK-miit oqariartuutigaarput una: Naammanngilaq oqariartoqattaarneq ”Amerikamiuunianngilagut, qallunaajunianngilagut”. Taamanikkulli ujartuilerpugut: Taavami suniaratta ?
Maannakkut naalakkersuisut siulittaasuata Jens Frederik Nielsenip ersarilluinnartumik sussanersugut oqariartornera assut iluarusuutigaarput, tassalu: Qallunaat nunaat aammalu Kalaallit Nunaat ataqqeqatigiillutik ataatsimoorlutik suleqatigiinnissaat pisariaqarluinnartoq, aammalu naalagaaffeqatigiinnerup ataqqeqatigiittumik nukittorsarneqarnissaa aatsaat taamak pisariaqartigilersoq.
Naalakkersuisut siulittaasuata ersarissumik aamma oqariartorpoq Nunat avannarliit suleqatiginerat aammalu EU-mik suleqateqarneq, minnerunngitsumillu NATO-p suleqatiginera, nukittorsarneqartariaqartut.
Taamatut Nalakkersuisut ersarissumik suniarnitsinnik tikkuussinerat kalaallit tamatta, nunatsinnut asannittuusugut, tunuliaqutsertariaqarparput.
USA-p præsidentiata kissaatigisaa annerpaaq tassaavoq kalaallit avisaartuunnissaat. Taanna iluatsissanngilaa.
Taamaammat naamminiilivinniarneq igivinngikkaluarlugu unitsilaarallartigu.
Nunatta oqartussaaffiginera ataatsimoorluta annaanniarallartigu. Piviusummi imaammata: Nunatsinnut oqartussaaneq kalaallit pigaat, tamannalu annaassanngilluinnarparput.
Taamaammat uteqqillugu: Nunatsinnut asannittuusugut nunarput asasarput ataatsimoorfigisigu, naalakkersuisullu suliniutaat tamarmiulluta ataatsimoorfigisigu.
Jess G. Berthelsen
Kattuffiup siulittaasua