SIK-p Nakkutilliisoqarfia Ilulissani ataatsimiissaaq marlunngorpat 30. juuni. Nakkutilliisoqarfik kattuffiup ataatsimeersuarnerisa akornanni ataatsimiittarpoq sulisartut peqatigiiffiisa peqataaffigisaannik, killiffissiorlutik kattuffiullu ingerlatsinera pillugu aalajangiiniarlutik.
Nakkutilliisoqarfiup ataatsimiinnerata malitsigisaanik SIK-p tunngavilerneqarneranit ukiut 70-inngornerat nalliussineqarniarpoq. Iluliarmiut tamatumunnga peqatiserineqarput juulip aallaqqaataani nal. 14.00, kulturikkut illorsuup Sermermiut eqqaani arsaattarfimmi tamanut ammasumik aaqqissuussisoqarniarmat. Tassani oqalugiartoqarlunilu, nipilersortoqarlunilu aliikkutaqartitsisoqarniarmat. Tamannalu sioqqullugu katinngatilisaarluni ingerlaaqatigiittoqarniarpoq Sermermiunit aallartittumik.
Nakkutilliisoqarfiup ataatsimiinnerani oqaluuserisassat ilaatigut tassaapput siulersuisuunerit nalunaarutaat sulisartut peqatigiiffiinut nassiunneqareersimasoq, kiisalu peqatigiiffinnit siunersuutinik oqaluuserisassaqarluni. Aamma SIK-p aningaasaqarnera pillugu ilisimatitsisoqassaaq kattuffiup 2025-mut naatsorsuutai tunngavigalugit.
Nakkutilliisoqarfiup ataatsimiinnerani pisussat allattorsimaffiat naapertorlugu Danmarkimi sulisartut kattuffiisa kattuffissuat Fagbevægelsens Hovedorganisation (FH) peqataatitaqartussaavoq. Kattuffissuup siulittaasuata tullia Nanna Højlund oqalugialaarniarpoq.
Taamatuttaaq Cathy Feingold videokkut inuulluaqqussuteqassamaarpoq. Taanna tassaavoq USA-mi suliffissuaqarnermi sulisartut kattuffiisa kattuffissuata American Federation of Labor and Congress of Industrial Organizations (AFL-CIO)-p direktøria.
Asseq qulaaniittoq: Siusinnerusukkut SIK-p ataatsimeersuarnerani katinngatllisaarluni ingerlaaqatigiinnermi assilisaq.
► SIK-p oqaluttuarisaaneranik paasisaqarnerujumallutit – una tooruk