Nutaaviujunnaaraluarput – SIK-p aamma Namminersorlutik Oqartussat 2022-mi ukiarnerani isumaqatigiissutaat (aamma kommuninut atuuttut), kingumoortumik 1. apriili 2022-mit atortussanngortinneqartut. Maannali isumaqatigiissutit pineqartut kattuffiup nittartagaatigut pineqarsinnaalerput.
Isumaqatigiissutit tamalaat 23-t tapiliussallu ataatsip allaqqissaarneqarnerat Namminersorlutik Oqartussat isumaqatigiinniartarnermut immikkoortortaqarfianni ingerlanneqarusaarsimavoq.
2022-mi novembarip arfineq-pingajuani SIK-p nittartagaani ilisimatitsissutigineqarpoq ”isumaqatigiissutit tamalaat allaqqissaarneqarnerat il.il. Namminersorlutik Oqartussani suli naammassineqanngitsoq”.
Maannali isumaqatigiissutit taakku 2022-mit 2026-mut atuuttussat naammassineqareersimalerput SIK-mullu nassiunneqarlutik, nuannaarutigalugulu nalunaarutigerusupparput taakku kattuffiup nittartagaanut aaneqarsinnaalermata, quppernermi ”Isumaqatigiissutit”-ni, immikkoortumi ”Namminersorlutik Oqartussat”-ni: ► Una tooruk
