NSIP, Nuummi peqatigiiffik SIK-p immikkoortortarisaa, allattoqarnikkut kattuffimmit sullinneqaannassaaq. Tamanna pillugu isumaqatigiissut 2020-milli atuuttoq iluarsaateqqinneqarpoq, 2025-milu ingerlateqqinneqassaaq. NSIP-p siulittaasua Sofie Svendsen aamma SIK-p allattoqarfiani pisortaq Bjarne Petersen taama isumaqatigiipput.
Isumaqatigiissutip imarisai pingaarnerusutigut tassaapput suliffeqarfinnut pulaarnissanik pilersaarusiorneq ingerlatsinerillu, siulersuisut ataatsimiinnerini allattuuneq, peqatigiiffiup aaqqissuussinerini ikiuunneq, ilaasortanut tunngasunik suliassat kiisalu illoqarfimmi sulisut sinniisorpassuinik suleqateqarneq.
Taaneqareersutut taama 2020-mi isumaqatigiissuteqartoqaqqaarpoq. Aammami kattuffik peqatigiiffillu illorsuarmi ataasiusumi allaffeqareerput, ilaasortallu peqatigiiffimmut atassuteqartut ullut tamaasa kattuffiup allattoqarfianukartarput arlaannik pisassaqarlutik sullinneqarlutillu. NSIP-lu taamani aalajangermat nammineq allaffimmiumik atorfeqartitaqarunnaarniarluni, allaffimmioqarnikkut pisariaqartitat SIK-mik isumaqatigiissuteqarnikkut matussusissallugit pissusissamisoorpoq.
SIK-mi allattoqarfimmi pisortaq Bjarne Petersen aamma NSIP-p siulittaasua Sofie Svendsen allattoqarnikkut suleqatigiinnissamik isumaqatigiissummik atsiortuupput.