Kalaallit Nunaanni sulisut kattuffiisa tallimat siulittaasuisa ataatsimoorlutik oqaaseqaataat:
Kingumut USA-p præsidentia oqariartorpoq nunarput tigorusullugu piariaqartillugulu. Uagut nunatsinnut asannittut avataaninngaanniit tiguniarneqarnerput akuersaanngilluinnarparput!
Kattuffiit ataatsimoorluta aammaarluta isumaqarpugut pingaaruteqarluinnartoq nunarput ataatsimoorfigissallugu, ataatsimut nipeqarluta oqariartuuteqartassalluta aammalu nunatta Kangianit, Kujataanit, Kitaanit, Avannaanit Avanersuarmiillu ataatsimuussuseqartariaqar-tugut; soorlu naalakkersuisugut aamma taamak oqariartuuteqartut.
Kattuffiit isumaqarpugut nunatta USA-mit tiguarniarneqarnera aallaavigalugu partiit tamar-mik aallaavitsik iperarlugu nunatta tiguarneqannginnissaa salliullugu ataatsimoorfigalugu sulissutigissagaat. Salliujuaannartariaqarpoq tamat oqartussaaqataanerup aqqani nunatsinni inuiaqatigiit ataatsimoortinniarneqartariaqartut pissutsini taamaattuni.
Nunatta najummisimanartorsiorfiani pingaaruteqarpoq ilaasortatta tamat oqartussaaqataanerup aqqani paasissutissanik ersarissunik ingerlaavartumillu saqqummiussisoqartarnissaa tusagassiisoqartarnissaalu. Taamaalilluta toqqissisimanarnerusumik ulluinnarni sulinerput ilaqutariinnerput ataatsimoornissarpullu aallunniassavarput.
Kaammattuutigerusupparput ammasumik inuiaqatigiinni eqqartueqatigiissinnaassasugut ataqqeqatigiilluta. Asissuinata! Aammalu kaammattorumavagut ilaasortagut, angajoqqaat, meeqqeriviit, meeqqat atuarfii, sunngiffimmi ornittakkat, ilinniarnertuunngorniarfiit ilinni-arfeqarfiillu kikkulluunniit inissaqartillugit maannakkut najummisimanartumik nalaataqarnitsinni annilaanganerit ernumanerit atuunneranni tapersersoqatigiilluta pissasugut.
Pingaaruteqarluinnarpoq inuiaqatigiinni silatusaartumik ileqqorissaartumillu pissusilersornissaq.
Pingaartilluinnarparput meerartatta inuusuttuarartattalu ataqqineqarlutik mianerineqarlutik illersorneqarnissaat, taamaattumik pissuserissaartumik killiliisinnaanissaannik apeqqusiisinnaanissaannillu aqqutissiuuttariaqarpagut nassuiaattarlugillu. Aammalu kaammattorumavagut ilaasortagut, angajoqqaat, meeqqeriviit, meeqqat atuarfii, sunngiffimmi ornittakkat, ilinniarnertuunngorniarfiit ilinniarfeqarfiillu kikkulluunniit inissaqartillugit maannakkut najummisimanartumik nalaataqarnitsinni annilaanganerit ernumanerit atuunneranni tapersersoqatigiilluta pissasugut.
Kattuffiit tamattaalluta naalakkersueqatigiit ilungersorlutik sullissinerat sulinerallu tunuliaqutserumavarput taperserlugillu. Nunarput namminiussuseqarluni allanit tatineqarnani ataatsimoorfigineqassasoq tamatta pingaartittariaqarparput.
Kissarpugut neriullutalu ilaasortagut tamassi sumi ittusi eqqissisimasumik uippallernaveersaarlusi pisunut malinnaassasusi, nunarput pillugu!
Kalaallit Nunarput tuniniagaanngilaq, aamma nunarput Kalaallit pigaat. Nunarput asangaagarput ataatsimoorfigisariaqarparput!
Kattuffiit sinnerlugit siulittaasut
Elna Heilmann, IMAK
Jess G. Berthelsen, SIK
Dina Olsen, AK
Arnaq Brønlund, NPK
Navarana Johansen, PK