Oqaaseqaat: Paasiuminaalluinnarpoq nalunaarutip nr. 16, 25. oktobari 2019-imeersoq allanngortinniarneqarneranut suna pissutaanersoq. Nalunaarut taanna immiaaqqat sodavandillu puuinik utertitsisarneq pillugu aalajangersakkanik imaqarpoq. Imaannerpa inuit ataasiakkaat imeruersaatinik qillertuusanik igalaaminernilluunniit puulinnik mamarisaminnik maani nunatsinni pisisinnaanngimmata allannguiniartoqartoq?
Taamaappat Inatsisartut Naalakkersuisullu nipituumik oqaannarlik Nuuk Imeq matuniarlugu.
Tassami SIK-mut ilaasortaasut Nuuk Imeq-mi sulisut 34-t suliffissaarutsinniarunikkit nalunaarut allanngortiinnassavaat. Taannaannaanngilaq. Maannakkut Nuuk Imeq-mi sulisut katillugit 50-it missaanniipput, taakkuuppullu Namminersorlutik Oqartussanut kommunimullu akileraartartut.
Taamaattumik Inatsisartunut Naalakkersuisunullu ilaasortat SIK-mit kajumissaarpavut eqqarsarluaqqullugit.
Aanami qularnanngitsoq: Nuuk Imeq-rup immiorfissuit nunarsuarmi allani inissisimasut nunarsuarmi tamarmi tuniniaasartut unammisinnaanngilluinnarpai.
Nunatsinniittugut tamatta Nuuk Imeq iluatigilluinnaqqissaartariaqarput. Ulluinnarni minnerpaamik 50-inik suliffissaqartitsivoq, aammali illoqarfiup iluani suliffeqarfinnik allanik suliassaqartitsilluni.
Jess G. Berthelsen
SIK-p siulittaasua